Ezohiko madalenak janzteko banderak salgai, Xenpelar Kultur dendan
Madalenetako banderak, Xanti Maialen eta buruhandiak ditu protagonista.
Madalenak bertan behera utzi dituzte aurten, eta beraz ez da txupinazorik, goizaldeko dianarik, Xanti eta Maialen eta buruhandien kalejirarik eta beste urteetako hamaika ekintzarik izango. Arduraz hartutako erabakia da, COVID-19aren osasun larrialdiak bultzatu duena, eta jai batzordeak eta udalak osasuna eta elkar zaintza erdigunean jartzearen emaitza.
Errenteriarrek baina erakutsi dute ospakizunak beste modu batean, arduraz, osasuna lehenetsita egiten iaioak direla; horren erakusle, Errenteriaren 700 urteurrenaren ospakizuna, edota Sagardo Egunarena. Madalenak ere etxeko goxotasunean ospatzerik izango dute, eta hala egingo du batek baino gehiagok. Horri begira, madalenen inguruko eta Errenteria-Orereta, edo Orereta soilik izena duten banderak salgai dituzte Xenpelar Kultur dendan. Madalenetako banderak, Xanti Maialen eta buruhandiak ditu protagonista.
Ikaragarri saltzen ari direla esan du Xenpelar Kultur dendako Eneko Arruabarrenak, “orain arte Orereta izena zuten banderak saldu izan ditugu, aurten Errenteria-Orereta izena dute, eta beste bat egin dugu madalenetarako; jende pilak erosi du jada balkoi eta leihoetan jartzeko”.
Banderak, 15 euroan daude salgai.
