Izan Bidea dinamikaren barruan ibilaldia antolatu du Sarek
Hilaren 18an (larunbata) egin du hitzordua Herriko Plazan, 12:00etan. Handik abiatuta bost kilometroko bidea egingo dute, euskal preso eta iheslarien aldeko elkartasuna eta aldarria auzoz auzo zabaltzeko.
Sare Herritarrak dinamika aurkeztu zuen eguneko argazkia. Euskal preso eta iheslariak etxeratzea du helburu Sare Herritarrak abiatu duen Izan Bidea iniziatibak. Helburua, Euskal Herriak duen biztanle beste kilometro egitea, eta horiek Izan Bidea aplikaziora biltzea. Errenteria-Oreretako Sarek ibilaldia antolatu du dinamikarekin bat eginez. Hilaren 18an (larunbata) egin du hitzordua Herriko Plazan, 12:00etan. Handik abiatuta bost kilometroko bidea egingo dute, euskal preso eta iheslarien aldeko elkartasuna eta aldarria auzoz auzo zabaltzeko, eta hala Iztieta (12:10ean anbulatorioan), Alaberga (12:20 auzo elkartearen plazan), Beraun (12:45 Galtzaraborda Hiribidean), Pontika (12:55ean Pontikako plazan) eta Gaztaño (13:15 Mikel Arrietaren etxe parean) zeharkatuko dituzte.
Ez da kasualitatea ibilbidea Gaztañon amaitzea. Izan ere, bertakoa da Mikel Arrieta larri gaixo dagoen Oreretako euskal presoa. Arrietak, Espondilartropatia kroniko seronegatiboa HLA B 27 du, gaixotasun kroniko, degeneratibo eta sendaezina. Gorputz adarretan eragiten dio gaitzak, eta oso mingarria izateaz gainera, oldarkorra dela nabarmendu dute. Algecirasko (Andaluzia, Espainia) espetxean aurkitzen da preso Arrieta, etxetik 1.100 kilometrora. Ez da larri gaixo dagoen Oreretako euskal preso bakarra; Aitzol Gogorza euskal presoa ere zerrenda horretan dago. Nahasmen obsesibo konpultsiboa du Gogorzak eta espetxealdi arinduan zigorra etxean betetzen ari bada ere, preso jarraitzen du. Gogorza ere Gaztañokoa da.
Ibilaldiaren amaieran ekitaldia izango da Gaztañon, Mikel Arrietaren etxea aurrean.
Sarek herritar guztiak deitu ditu parte hartzera beharrezko osasun eta higiene neurriak hartuta eta distantzia fisikoa bermatuta, “orain arte bezala ahalik eta jendetsuena eta anitzena egin nahi dugu ibilaldia”.
