[Galeria] Puntetarako eta farorako bidea zabalik nahi dute sanpedrotarrek
Ondartxo bidea zabal dezaten eskatzeko manifestazio "zaratatsua" egin dute gaur San Pedron. 20:00etan frontoitik abiatu eta pasealekura arte joan dira kazola, danbor eta txindatek markatutako erritmoan.
San Pedroko frontoitik abiatu dira 20:00etan. 
Aste honen hasieran egin zuen manifestaldi “zaratatsurako” deia San Pedroko herritar talde batek. Kale-agerraldia 20:00etan abiatu da herriko frontoitik; danborrak, txindatak, kazolak eta bestelako instrumentuak ozen astinduz egin dute bidea herritarrek, Ondartxo pasealekura heldu arte. Kalean bildu direnez gain, ez dira falta izan etxeetako balkoietatik eta tabernetako mahai zein leihoetatik protestarekin bat egin nahi izan dutenak.
Ez dira falta izan tabernako leihotik protestarekin bat egin nahi izan dutenak.
Kaleen isiltasuna aldarri moduan hautsi dute sanpedrotarrek, aspaldi ari baitira eskatzen farorako eta puntetarako bidea zabal dezaten. Pasealekura arte heldu eta, ibilaldiaren bueltan, Torreko plazan, korro batean gelditu dira. Bertan, Ondatxo bidea zabaltzeko eskaera luzatu dute, behin berriro ere, eta “herritarren inplikazioa” ezinbestekoa dela azpimarratu dute, “sinaduren bitartez edota haurren marrazkien bidez, berdin du”.
Jakinarazi nahi izan dute manifestaldiaren xedea ez zela “inori errurik botatzea”, ez jabeei, ez portuari, ezta udalari ere, baizik eta pasealekuak sanpedrotarrentzat duen garrantzia ikusaraztea eta soluzioak eman ditzaten eskatzea, denon hoberako. Herritar batek egindako adierazpen horiei amaiera eman diote, ez soilik bertaratu direnen txaloek, baita diskurtsoaren amaieran portutik pasatzen ari zen itsasontzi baten klaxon-hotsak, zeinak, herritarren bilera ikusita, protesta zaratatsuarekin bat egin nahi izan duen.
