Kultur eskaintzak hedatzen jarraituko du, baita abuztuan ere
Gaur aurkeztu dute Kulturabirusa egitarauaren bigarren zatia. Abuztuko egitarauko ekitaldietan herriko eragileak izango dira aktore nagusiak.
Kulturabirusaren lehen olatua joana da, eta berragertzea iragarri dute asteburu honetarako. Gaur goizean aurkeztu dute udako kultur eskaintzaren bigarren zatia. Uztailean herriko sortzaileak izan baziren protagonista, abuztuan eragileak izango dira. Oiartzungoak, esan gabe doa.
Iosune Cousillas Kultura zinegotziak herriko eragileei eskertu die, “udara goxo eta atsegina” antolatzen aritzeagatik. Modu berean, esan du polita dela aurten gauza berriak sortzea. Orain arte egindakoaren balorazio positiboa egin du, ekitaldiak auzoetara eraman direlako eta herritarren parte hartzea txukuna izan delako.
Asteburu honetan bertan hasiko den blokeari begira, askotariko ekitaldiak izango direla esan du Cousillasek. Parte hartuko duten eragileen zerrendari errepasoa eman dio Kultura zinegotziak: Lartaun txistulari taldea, ezkilak jotzen aritzen den taldea, Oiartzungo Feministen Asanblada, Biyurrienea, Ibargain Musika Eskola… Abuztu guztia hartuko duen egitaraua osatu dute denen artean.
Aforoa
Uztailean bezala, abuztuko ekitaldi gehienek edukiera mugatua izango dute —zenbat diren zehazten da beheko zerrendan—. Doan izango dira, baina aldez aurretik txartela hartu beharko da Oarsoaldeko Turismo Bulegoan. Pertsona bakoitzak, gehienez, bi txartel har ditzake.
Fermiñene eraikinaren beheko solairuan dago turismo bulegoa. Honako ordutegia dauka, egunero-egunero: 10:00 etatik 14:00etara eta 16:00etatik 19:00etara.
Egitaraua
Abuztuak 1, larunbata
- 19:00etan: Bado ze jo ta ze kantatua! -Arozenatarren ttun-ttuna- (Arizmendi lorategian. Eguraldi txarrarekin: udaletxeko areto nagusian). Aforoa: 50 lagun.
Abuztuak 2, igandea
- 09:00: Diana.
- 10:30: Ezkila-jotzea.
Abuztuak 3, astelehena
- 11:00: Musikarien kalejirak (auzoetan).
Abuztuak 5, asteazkena
- Egun osoan zehar: Erronka birtualak (Biyurrienearen sare sozialetan).
Abuztuak 13, osteguna
- 18:00: Elikadura tailerra (Arizmendi lorategian. Eguraldi txarrarekin: udaletxeko areto nagusian). Aforoa: 30 lagun.
Abuztuak 15, larunbata
- Egun osoan zehar: Mugalayan kontuk altxorraren bila (Herrian zehar). Aforoa: 78 lagun.
Abuztuak 16, igandea
- 12:00: Bertso saioa: Alaia Martin eta Andoni Egaña (Karrikako frontoian. Eguraldi txarrarekin: udaletxeko areto nagusian). Aforoa: 50 lagun.
Abuztuak 27, osteguna
- 17:00: Bizikleten mantenu tailerra, emakumeentzat (Haurtzaro Ikastolako frontoian). Aforoa: 30 lagun.
Abuztuak 28, ostirala
- 19:30: Suo Gan-en kontzertua (Arizmendi lorategian. Eguraldi txarrarekin: udaletxeko areto nagusian). Aforoa: 50 lagun.
Abuztuak 29, larunbata
- Egun osoan zehar: Baga, biga, liga! finala (Beheko plazan). Aforoa: 78 lagun.
