Pala txapelketako finalak larunbatean jokatuko dituzte
Hernandez eta Susperregi oiartzuarrek tanto bakarrarengatik ez zuten lortu finalerako txartela. Finaletako sari banaketan ordezkari ugari egongo dira.
Zutik, Hernandez, Suspe, Bidegain epailea, Zurutuza eta Manterola. Makurkuta, Loidi anaiak eta Atxotegi eta Gallastegi.
Euskal Herriko Pala Txapelketa Irekia datorren larunbatean bukatuko da. Aurtengoa 38. ekitaldia izango da, eta 82 bikote lehiatu dira, gizonen hiru mailatan banatuta. Sei bikote onenak elkartuko dira, eta emakumeen erakustaldi partida bat ere jokatuko dute Madalensoron. Nesken partidako bikoteetako bat iazko txapeldunak izango direla iragarri dute.
Finaletan ez da Oiartzungo bikoterik izango. Hernandez eta Susperregik, Hirugarren Mailan, tanto bakarreko aldeagatik galdu zuten, ia partida osoa aurretik joan ondoren.
Larunbateko partidak 08:15ean hasiko dira. Orain arte bezala, COVID-19a ekiditeko neurriak hartuko dituzte. Partidak jokatu ondoren, sari banaketa egingo dute, eta urtero bezala, osetxo Gamio eta Joxe Carreraren senideekin batera, Gipuzkoako Pilota Federazio eta Oiartzungo Udaleko ordezkariak ere izango dira. “Txapelketa osoan Madalensoron giro jatorra eta polita egon da eta finaletan ere horrela izatea espero dugu”, esan dute antolatzaileek.
Lehen Maila
- Salaberria – Huegun / Aizpuru – Dagerre.
Bigarren Maila
- Eskudero – Beloki / Atxotegi – Gallastegi.
Hirugarren Maila
- Agirre – Mendigain / Zurutuza – Manterola.
