COVID-19ra moldatutako Indiorock jaialdia ate joka da
Orain arte beharrezkoa bazen, orain are beharrezkoagoa bihurtu da musikari eta kulturgileei babesa ematea eta horri begira, berrinterpretatu egin dute jaialdia antolatzaileek.
Jon Gurrutxaga & Urbil Artolak zabalduko dute jaialdia. Indiorock jaialdia egingo dute aurten ere, baina ez da izango betikoa. Ez dator ohiko formatuan, ezta ohiko datetan ere, COVID-19aren eraginez moldatu eta birpentsatu egin behar izan dutelako orain arte jaialdi ibiltaria izan dena.
Argi dute. Orain arte beharrezkoa bazen, orain are beharrezkoagoa bihurtu da musikari eta kulturgileei babesa ematea eta horri begira, berrinterpretatu egin dute jaialdia antolatzaileek. Osasunak ezartzen dituen mugak onartu eta hainbat herritan erabiltzen ari diren formulaz baliatuko dira. Ez da ibiltaria izango; horren ordez formatu txikiko topaketa izango da aurten Indiorock. Miguel Irastorza futbito zelaia izango da emanaldi guztien agertokia, eta abuztuaren 8an egingo dute —orain arte madalenen barruan egiten zuten jaialdia hilaren 22an—.
Jaialdia, gainera, bi txandatan banatu dute. Lehenengoa 17:00etan hasiko da eta Jon Gurrutxaga & Urbil Artolak gospela, bluesa, folka eta poprockaren eragina duen Kateak disko berria aurkeztuko dute. Segidan, Ana Arsuaga tolosarrak Verde Prato proiektu pertsonala aurkeztuko du.
Bigarren txanda 21:00etan hasiko da Mukuru kolektiboko kide den Ekhi Lanbert musikariarekin. Grabatu berri duen Haustura diskoa aurkeztuko du.
Amaitzeko, Lapurdiko Luni Pop elektroniko bikotea ariko da.
Emanaldietarako aurrez erreserba egin behar da e-postaz edo Erdiko kaleko Zituene Pasta obradorean.
