Kilometro Lezon eragina izango du koronabirusak
Murixka Dantza Taldeak biharko iragarrita zuen emanaldia bertan behera gelditu da. Larunbateko musika eskolako rock taldeen kontzertua bere horretan mantentzen da.
Iritsi da Kilometro Lezo kultur egitasmoaren laugarren asteburua. Baina aldaketekin dator. Izan ere, biharko (ostirala) Murixka Dantza Taldearen emanaldia zegoen iragarrita programazioan, eta eragiletik jakinarazi dutenez, bertan behera utzi dute azken egunetan COVID-19ak herrian izan duen eraginagatik. Larunbateko ekitaldiak indarrean jarraitzen du, ordea.
«Gure aldetik segurtasun neurriak bermatzen saiatu garen arren, azken egunetan Lezoko egoera larriagotu dela ikusita, Murixka Dantza Taldeak saioa bertan behera uztea erabaki du egoera ez larriagotzeko intentzioarekin. Egoera hobetzean berriro ikusiko dugu elkar», jakinarazi dute dantza taldetik.
Larunbateko musika saioak aurrera darrai. Tomas Garbizu Lezoko Udal Musika Eskolako ikasleen txanda izango da. Bertako rock taldeen saioa da, eta 23:00etan hasiko da, Herri Eskolako jolastoki estalian: Ordu Txarra, Jaig eta Gotzen rock taldeen kontzertua gogoratzekoa izango da, nahiz eta publikoak eserita egon besterik ez duen izango. Izan ere, koronabirusaren aroak ezarritako segurtasun arauek bere horretan jarraituko dute, tartean gonbidapenak (doan dira) eskuratzearena. Horiek Kultura saileko bulegoan edo Lezoko Udalaren webgunean lor daitezke.
Bukatzeko, antzerkia
Kilometro Lezo bukatzeko, antzerki maratoia hilaren bukaeran, Herri Eskolan. 25ean, Marie de Jongh konpainiak Ikimilikiliklik lana emango du (20:00); 26an etxekoek, Orratx! Antzerki Taldekoek, Bernarda Albaren bost alabak antzezlana zabalduko dute (22:00); eta 27an, El funeral lana Producciones Che y Mocheren eskutik.
