Datorren astean irekitzeko baimena izatea espero du Tiñeluk
Taberna irekiko luketen langileen zerrenda pasa dute, eta aldi berean lokalaren desinfekzioaren ziurtagiria. Pasatakoaz ondorioak atera behar direla esan dute.
Tiñelu elkarteko zuzendaritzak bertan izandako COVID-19 kasuaren gaineko informazioa herritarrei ematen jarraitzen du. Gaur zabaldu dutenez, datorren astean elkartearen nahiz tabernaren irekiera baimena izatea espero dute; astelehenean agindu zieten Osalanek eta Jaurlaritzak behin-behinean ixtea, osasun neurri gisara. Hartara, irekierarako bi baldintza eskatu dizkietela zehaztu dute Tiñelutik: taberna irekiko luketen langile ez kutsatuen zerrenda erraztea, eta lokalaren desinfekzioa egin izanaren ziurtagiria ematea. Biak ala biak aurkeztu dituztela zehaztu dute Tiñelutik.
Elkartekideek nabarmendu dute itxiera aginduan ez zela inongo aipamenik egin bertan agerraldia izan zela: “Gure datuen arabera, elkartearen inguruko jendartean transmisioak ez du ia eragin, eta guztiz kontrolatua dago”. Hori, tabernarien eta elkartearen erabiltzaileen jarrera eta jarduera zuzenagatik izan dela adierazi dute, “horregatik, mila esker guztioi”.
“Sortutako alarma egoera eta zalaparta normaltzat jotzen dugu”, aitortu dute elkartearen zuzendaritzako kideek. Baina etorkizunean gerta daitezkeen antzerako kasuetarako ikasgaia ere izan dela nabarmendu dute, “ondorioak ateratzea ezinbestekoa dela ikusten dugu. Kudeaketa hobeagoak burutze aldera, herri mailako COVID-19 batzorde baten eraketa begi onez ikusten dugu”.
Besarkada bidali diete etxean konfinatuta dauden guztiei, “gaixorik egon ala ez”. Zabaldu duten mezu baikorrak adi eta arduratsu jarraitzeko balio dezala desio dute.
