Lezoko Santakrutz Jaiak, bertan behera
Jai Batzordek, udalak eta herriko merkatari nahiz ostalariek elkarrekin hartutako erabakia izan da, lezoarren osasuna lehenesteko.
Aurten ez da Santakrutz Jairik izango Lezon. Agiria bidali dute hedabideetara festen etetearen arrazoien berri emateko Jai Batzordeak, Lezoko Udalak eta Lezoko ostalari eta merkatariek: “Erantzukizunez jokatuz eta lezoarrren osasuna bermatzea lehenetsiz, herriko tabernari eta merkatariekin nahiz udal korporazioarekin batera, 2020ko santakrutzak ez ospatzea adostu dugu”. COVID-19ak, beraz, Mendekoste Jairik eta santakrutzik gabe utzi ditu aurten lezoarrak. Baina ardura kolektiboa jarri dute festaren gainetik, “erantzukizunez hartutako erabakia izan da”.
Abuztuaren 25ean egindako bileran mahaiaren gainean jarri zuten festak egin ala ez, betiere COVID-19ak eragindako testuingurua aintzat hartuta. Festak herri nortasuna indartzeko tresna direla garbi dute jai batzordean bildu zirenek, Lezo eraikitzen jarraitzeko egun garrantzitsutzat dituzte. Baina lehentasun bezala lezoarren osasuna jarri dute batzordekideek: “Santakrutzak besarkadak, musuak dira. Hain hurbileko ez ditugun pertsonekin harremantzea da. Lagun talde ezberdinak elkarrekin eta batera aritzea dira. Santakrutzak distantzia sozialik eza dira”.
Horrela, hurrengo urtari begira jarri da Jai Batzordea. 2021ekoak alaiagoak, biziagoak, ederragoak eta gertukoagoak izateko lan egingo dutela ziurtatu dute Jai Batzordea osatzen dutenek: “Aurten ez dugu Santakrutz Jairik izango, datorren urtekoak lezoarragoak izan daitezen”.