Errenteria Atletismo Taldeak hasi du denboraldia
Osasun agintariek ezarritako neurri guztiak zorrotz beteta eta beste erakunde eta federazioetatik helarazitakoak errespetatuta hasiko du denboraldia Errenteria Atletismo Taldeak, kirolari guztien osasuna bermatzeko.
Korrika egiteko taldeak antolatu ditu EATk. Osasun agintariek ezarritako neurri guztiak zorrotz beteta eta beste erakunde eta federazioetatik helarazitakoak errespetatuta hasiko du denboraldia Errenteria Atletismo Taldeak, kirolari guztien osasuna bermatzeko. Aurten Beraungo estadioa berrituta itzuliko dira, gainera, udalak pistaren zati bat estali duelako, eta horrek batez ere neguan, kirolarien entrenamenduak erraztuko ditu.
Hilaren 17an, osteguna, hasiko dute denboraldia eta bost ekintza antolatu dituzte 2020-2021 denboraldiari begira. Eskola da horietan lehena. Benjamin, Kimu eta Infantilei begira, urriaren 1ean abiatuko dute, eta eskolako federatuek, berriz, hilaren 17an hasiko dituzte entrenamenduak. Eskolan parte hartzen dutenek, kirola modu osasungarri eta atseginean ezagutzeko aukera iznago dute, eta atletismoaren modalitate ezberdinak izango dituzte eskura horretarako: abiadura, jauziak, hesiak, jaurtiketak eta iraupen probak. Bi astez konpromisorik gabe probatzeko aukera izango dute. Entrenamendu egunak mailaren araberakoak dira, eta horrela, benjaminek (2011-2012) asteazken eta ostiraletan dute entrenamendua 17:30etik 18:30era; kimuek (2009-2010) asteazken eta ostiraletan 17:30etik 18:30era; eta infantilek (2007-2008) astelehen, ostegun eta ostiraletan 18:00etatik 19:30era.
Bigarren eskaintza, berria da, Carfit taldea. Gazteei begirako aire libreko entrenamendu funtzionala da, eta 14 urtetik gorako gazteei begirakoa da. Indarra, tonifikazioa eta abiadura landuko dituzte.Entrenamendu egunak astearte eta ostegunetan 17:30etik 18:30era eta asteazken eta ostiraletan 18:30etik 19:30era.
Federatuen taldea 14 urtetik gorakoentzat da eta adin txikikoen eta masterren taldeak dituzte. Entrenamenduak astelehen, astearte, ostegun eta ostiraletan dira 17:30etik 19:00etara.
Running talderen bidez kirol errendimendua hobetzeko teknikak landuko dituzte eta astearte eta ostegunetan entrenatuko dute hilaren 17an hasita 13:30etik 14:30era, 17:30etik 18:30era, eta 19:00etatik 20:00etara. Azkenik entrenamendu funtzionaleko taldea abiatuko du Errenteria Atletismo Taldeak hilaren 16an. Entrenamenduak astelehen eta asteazkenetan egingo dituzte orduteghi zabal batekin: 09:30etik 10:30era, 13:30etik 14:30era, 17:30etik 18:30era; 18:30etik 19:30era eta 19:30etik 20:30era.
