Hamalau dira COVID-19arekin Jesusen Bihotza egoitzan kutsatutako egoiliarrak
Oraindik ere, egindako proben emaitza batzuk falta dira, eta COVID-19aren protokolo guztiak martxan dituzte egoitza horretan. Hamalau egoiliarrez gain, bi langile ere positibo izan dira.
Hilaren 7an COVID-19an positiboa zen egoiliarra atzeman zuten Errenteriako Gabierrota auzoko Jesusen Bihotza adinekoen egoitzan. Ordutik PCR probak egin dituzte egoitza horretan, positiboa izan zen egoiliarraren planta berean ziren beste egoiliarrei lehenik, eta erresidentziako gainontzeko egoiliar eta langileei. Momentuz, hamalau positibo zenbatu dituzte bertan egoiliarren artean, eta bi langile ere positibo izan dira. Guztira, beraz, egoiliar eta langileen artean, 16 dira Jesusen Bihotzaren egoitzan COVID-19ak kutsatutakoak.
Gehienak asintomatikoak direla, zehaztu dute, bestalde, eta ez dute jakinarazi momentuz egoiliarretakoren bat ospitaleratu behar izan duten, eta COVID-19an positibo izan diren egoiliarretatik zenbat lekualdatu dituzten Eibarrera. Lekualdatzea, adinekoen egoitzak COVID-19tik libre uzteko egiten dituztela azaldu du aldundiak. Bi datu horiek beraz, ez dituzte eman momentuz. Jakinarazi dute, halaber, egoiliarren 14 positiboak planta eta sektore berean atzeman dituztela.
Oraindik ere, egindako proben emaitza batzuk falta dira, eta COVID-19aren protokolo guztiak martxan dituzte egoitza horretan: isolamendua, desinfekzioa, babes eta segurtasun neurriak eta PCR probak, besteak beste.