Lezoko PSE-EEk ardurarako mezua zabaldu du ez-jaietarako
Ospakizun paralelorik ez dadila egin eskatu du. Herritarrak COVID-19aren kontrako borrokaren soluzio izan behar direla uste du, eta ez oztopo.
Lezoko PSE-EEk mezu garbia zabaldu du santakrutzetakoak beharko luketen egunen harira: “Aurten ez da tokatzen jairik egitea. Arazoaren soluzioa izan behar dugu herritarrok, eta ez oztopo. Hurrengo urteko jaiak indar eta poztasun handiagoarekin ospatuko ditugu”. Horrela, ospakizun paraleloak ez daitezela egin eskatu du alderdi sozialistaren udaleko eledun Jose Angel Sanchezek: “Gure ekintzek ondorio larriak izan ditzakete, norberarengan eta inguruan ditugun pertsonengan”.
COVID-19aren eraginagatik bertan behera gelditu dira 2020ko Santakruz Jaiak. Mendekosteekin ere hala egin zuten. Sanchezek berretsi du jaiak bertan behera uztearen erabakia egokia izan dela, gogorra izanagatik: “Begien bistakoa da egungo egoerak ez duela ahalbidetzen jaiak ospatzea, are gutxiago jaietako ekitaldien muinean herritarren parta hartzea dagoela”.
Herritarrek, bakarka eta era kolektiboan, osasun agintariek ezarritako neurriak bete ditzatela eskatu du PSE-EEko ordezkariak, koronabirusaren zabalkundea mozteko. “Ezin dugu atzera urratsik egin borroka honetan. Birusari ezin diogu tarterik eman”.