Garagardo zaporerik gabeko urria izango da aurtengoa
Garagardo festarik ez da egingo Oiartzunen. Antolatzaileek azaldu dutenez, ez dute gai ikusten parte hartzaileen segurtasuna bermatzeko.
“Aurten Garagardo festan jai dugu”. Horrela hasten da Oiartzungo Garagardo Festako antolatzaileek bidali duten oharra. Egoera normalean urriko bigarren asteburuan ospatu beharko litzateke, baina aurten Done Eztebe plazan ez da karparik egongo.
Beste hainbat ekitaldiekin gertatu den bezala, COVID-19ak sortutako egoerak behartu du Garagardo Festa bertan behera uztea. Antolatzaileek ez dute beren burua gai ikusten boluntario ibiltzen direnen osasuna bermatzeko, ezta garagardo dastaketa handian parte hartzen dutenena ere.
“Egoera honen aurrean, Festaren antolakuntzan gabiltzanok, Oiartzungo Garagardo Festa ez antolatzea erabaki dugu”, iragarri dute.
Oiartzuarren konpromisoa, goratuta
Festa ez dela egingo iragartzeaz gain, beste mezu bat bidaltzeko baliatu dute oharra. Festaren antolatzaileek oiartzuarren konpromiso komunitarioa nabarmendu dute. “Denon artean, gure erabakiekin, egingo diogu aurre gaitzari. Herri gisa sentitu eta herri moduan jokatzeko garaia da”, gaineratu dute.
Bakoitzak norbere burua zein hurkoa zaintzera deitu dute. “Datorren urtean gogo onez dastatuko ditugu garagardoaren kulturaren gutiziak eta elkarrekin ospatuko dugu garagar uztaren emaitza”, gaineratu dute.
