Antxoko Auzo Elkartea hilero bilduko da alkatearekin
Bizilagun taldeak iragarri du udal gobernuarekin izandako bilera bide onetik joan zela eta positiboki baloratzen dutela lehen kontaktua. Hilero herriko gaietan sakonduko dute.
Antxoko Auzo Elkarteak lehen kontaktua egin zuen pasa den astean Pasaiako Udalarekin, herriko alkate den Izaskun Gomezekin eta Loreto Osa Gizarte Ekintza zinegotziarekin bilduz. Elkarretaratze hori modu positiboan baloratu du herritar taldeak, eta euren helburuetako bat lortu dutela iragarri dute: Maiztasun jakin batekin (hilero) udal gobernuarekin biltzeko konpromisoa hartzea, barrutian dauden premiazko beharrei erantzun ahal izateko.
Auzo erakundeak Antxoko herritarrekin harremanak estutzeko prestutasuna adierazi nahi izan du. Barrutiko hainbat talde jarri dira harremanetan haiekin eta hurrengo egunetan bilduko dira, antxotarren ezinegonak entzun eta ahal den moduan konponbidea ematen ahalegintzeko.