Ane Santestebanek zazpigarren postuan bukatu du Giro Rosa
Gaurko azken etapan sailkapen nagusian postu bat hobetzea lortu du, eta munduko txirrindulari onenen artean dagoela azaldu du errenteriarrak.
Santestebanek leher eginda bukatu zuen ostiraleko zortzigarren etaoa. Argazkia: Ane Santesteban / Twitter Gaur bukatu da emakumeen txirrindularitzako egutegian munduko karrerarik garrantzitsuenetakoa, Italiako Giro Rosa. Bederatzi etapako jardunaren ondoren, Ane Santesteban txirrindulari errenteriarrak zazpigarren postuan bukatu du sailkapen nagusian, proba irabazi duen Anna Van Der Breggen-etik sei minutu eta 31 segundora (herbeherearraren hirugarren garaipena izan da Giroan).
Ceratizit taldeko txirrindulariak sailkapen orokorreko zortzigarren postuan hasi du gaurko eguna. Azken etapak Motta Montecorvino izan du abiapuntu eta helmuga, eta 109,9 kilometrokoa zen: zirkuitu bati lau itzuli eman dizkiote.
Hala, etaparen azken zatian hamabi lasterkariko talde batek pelotoiari aurrea hartu dio, eta bertan zen Evita Muzic frantziarra izan da etaparen garaile. Errenteriarra pelotoi nagusian heldu da helmugara, iheslarietatik hiru minutu eta 50 segundo ingurura.
