Lanera bizikletan joatea sustatuko du proiektu aitzindari batek
Mugikortasunaren astearen barruan aurkeztu dute 'Lanera bizikletan' egitasmoa, erakundeek eta tokiko eragileek bultzatuta.
Bidegorrian aurkeztu dute ‘Lanera bizikletan’, Aranguren industrialdearen parean.
Bizikletak, bidegorria eta industriaguneak elkartzen diren toki batean aurkeztu dute Lanera bizikletan egitasmoa. Oarsoaldeko udaletako, garapen agentziako, aldundiko, Don Boscoko eta Gurpil Artea elkarteko ordezkariek aurkeztu dute egitasmoa, Mugikortasunaren Astearen azkeneko egunean.
Gipuzkoan proiektu aitzindaria da Lanera bizikletan. Oarsoaldea aukeratu dute baldintza onak dituelako: industrialdeak ditu bidegorrietatik gertu. Eneritz Arbelaitz Oiartzungo zinegotziak eta Oarsoaldeko Mugikortasun Mahaiko buruak azaldu duenez, zaratarik eta kerik gabeko herriak nahi dituzte.
Erakundeen arteko elkarlana txalotu du: “Denek batera lan egiten baldin badugu, fruitua ona izango da”.
Hiru fase
Oihan Lopez Gurpil Artea elkarteko kideak azaldu du bere elkarteko kideak boluntarioak direla, eta erakundeen babesa eskertu du. Lanera bizikletan egitasmoaren pausoei errepasoa eman die. Hiru fasetan banatuko dira.
Lehenengo fasean, eskualdeko hainbat enpresetako —20-30 bat— langileek zein mugikortasun ohiturak eta baldintzak aztertuko dituzte. Diagnosian honelako aldagaiak hartuko dituzte kontuan: kokapen geografikoa, hiriguneekin lotura, bizikletak uzteko aparkaleku seguruak, arropa bustia uzteko toki egokiak…
Bigarren fasean, dekalogo bat egingo dute, enpresek beren ohiturak aldatzen has daitezen, etxetik lanerako ibilbideak bizikletan susta ditzaten. Oarsoaldea Garapen Agentziak banatuko du material hori.
Dekalogoak markatutakoak enpresa pilotu batean aplikatuko dituzte. Enpresa horrek laguntza zuzena jasoko du proiektua garatu ahal izateko: ekintzak, bizikletaren gaikuntza, mekanika eta mantentze ikastaroak, aholkularitza, laguntza pertsonalizatua…
Gainera, ibilbide luzeei edo desnibel handiari aurre egin behar dieten langileei bizikleta elektrikoak utziko dizkiete aldi baterako. Energiaren Euskal Erakundearen lankidetza izango dute.
Azkenik, Don Bosco Lanbide Heziketako ikastetxeak parte hartuko du. ETHAZI zikloko ikasgeletan erronka bati aurre egingo diote: bizikletentzako aparkalekuak diseinatu eta eraikiko dituzte. Eskatzen dituzten enpresetan jarriko dituzte.
Gipuzkoara hedatu
Rafaela Romero Gipuzkoako Mugikortasun diputatuak hartu du hitza. Bere esanetan, aisia eta ariketa fisikoa egiteko erabiltzeaz gain, bidegorriek garraio sarearen parte izan behar dute. “Ke isuririk gabeko planteamendua egin nahi dugu, eta bidegorri sarearen aldeko apustua egin”, gaineratu du.
Iragarri duenez, Lanera bizikletan proiektuak emaitza onak ematen baditu, eredugarri izango da, eta Gipuzkoako beste eskualde batzuetara esportatuko dute.
