Xabier Lete prosa eta poesia lehiaketarentzako irudia sortu dute
Allende Arnaiz eta Idoia Beratarbidek sortu du irudia, Xabier Leteren inizialetan oinarrituta. Iazko lan sartiuak banatu dituzte herriko ikasleen artean.
Aitziber Arnaitz (Euskara teknikaria), Arantza Lete (Xabierren arreba), Josu Delgado (Euskara zinegotzia) eta Idoia Beratarbide (irudiaren egileetako bat). XXIII. Xabier Lete Prosa eta Poesia Lehiaketa martxan dago, eta ikasleek urriaren 29ra arte izango dute izena emateko epea. Aurten, gainera, irudia estreinatuko du lehiaketak. Metrokoadroka kolektiboko Allende Arnaiz eta Idoia Beratarbide sortzaile oiartzuarrek diseinatu dute irudi berria.
Leteren inizialetan oinarrituta sortu dute irudi berria. Horrez gain, gutunazal batek osatzen du logotipoa. Sortzaileek azaldu dute: “Xabier Leteren izen eta abizenaren X eta L hizkiak erabili dira, elementu ikonografiko bat gehituta. Elementu hori papera edo gutun-azala litzateke, lehiaketari erreferentzia eginez. L hizkia eraldatu da idazluma baten punta irudikatzeko. Erdian, X hizkia erabili da idazlearen sinadura irudikatzeko, sortzailea erdigunean kokatuz”.
Hemendik aurrera, irudi hori erabiliko dute lehiaketarekin zerikusia duen edozertan aterako da: sariaren deialdi eta oinarrietan, sari banaketan edota saritutako lanak jasotzen dituen liburuxkan.
Aurten beteko dira hamar urte Xabier Lete hil zela, eta, udaleko Euskara Sailaren ustez, momentu egokia da irudi baten bidez identifikatzeko.
Liburuxka, banatuta
2019ko ekitaldiko sarituen idazlanak jasotzen dituen bilduma argitaratu du Oiartzungo Udalak. COVD-19ak sortutako egoeragatik, atzeratu egin da ikastetxeetako banaketa.
Pasa den astean Elizalde Herri Eskola, Elizalde Institutuko eta Haurtzaro Ikastolako Lehen Hezkuntzako bigarren mailatik gorako ikasle guztiek jaso dute liburua. Lan horiek Interneten irakurtzeko aukera ere bada, udalaren webgunean sartuta.
