Auzotarren ekarpenak jasoko dituzte, aurten ere, Oiartzunen
Urriaren 5era 8ra bitartean, udalak bilerak egingo ditu auzotarrekin. Aurten baldintza berezietan egingo da.
Iazko auzo batzarra, Altzibarren.
Auzo batzarrak egingo ditu Oiartzungo Udalak, COVID-19ak sortutako egoerak baldintzatuta. Horregatik, bilerek edukiera mugak izango dituzte eta aurrez lekua erreserbatzea gomendatu du udalak. Horretarako e-posta bidez postara idatzi beharko da edo 943 49 18 62 telefono zenbakira deitu. Erreserba egiten dutenek sartzeko lehentasuna izango dutela nabarmendu dute.
Urteko errepasoa egin, udalaren egoera aurrez aurre azaldu, eta 2021eko aurrekontuaren behin-behineko proposamena aurkeztuko dituzte batzarretan. Auzo bakoitzaren errepasoa ere egingo dute, eta bizilagunen ekarpenak jaso. Bilkura guztiak 19:00etan hasiko dira.
Xorrola erabiltzeko deia
Arragua, Altzibar, Iturriotz eta Ugaldetxoko bilerak auzotik kanpo egingo dituzte, udaletxeko pleno aretoan. Horregatik, udalak gogorarazi du herri barruko autobusa erabil dezaketela auzotarrek.
Bilerara puntual iristeko ordutegiak hauek direla nabarmendu du udalak: Arraguan 18:40ean; Ugaldetxon 18:45ean (Juansendo) eta 18:46ean (Intxixu parean), Iturriotzen 18:48ean (Ibarre) eta 18:49ean (Bidezarra kalea); eta Altzibarren 18:50ean (Kale Berria goian) eta 18:51ean (Kale Berria).
Egutegia
Urriak 5, astelehena
- Ergoien (Auzokalte elkartean).
- Ugaldetxo (udaletxeko areto nagusian).
Urriak 6, asteartea
- Altzibar (udaletxeko areto nagusian).
- Elizalde (Manuel Lekuona bibliotekan).
Urriak 7, asteazkena
- Iturriotz (udaletxeko areto nagusian).
- Karrika (Artaso elkartean).
Urriak 8, osteguna
- Arragua (udaletxeko areto nagusian).
- Gurutze (Bizardia elkartean).
