Orotariko kirol abenturak eskainiko dituzte, lehiarik gabe, DBHko ikasleentzat
Pasaia Kirol Badia Klubean izena eman daiteke dagoeneko. Bi talde sortuko dira: astelehen eta asteazkenetan bata, eta astearte eta ostegunetan bestea.
Talde bakoitzeko parte-hartzaileekin diseinatuko da ikasturteko programa. 
Pasaiako Udalaren Jarduera Fisikoaren eta Kirolaren Sailak bigarren urtez DBHko ikasleentzat lehiaketarik gabeko eskaintza bat jarriko du abian. Bigarren hezkuntzako ikasle guztiek eman dezakete izena, taldeak hilaren amaieran osatuko dira, izen emateen baitan. Talde bakoitzeko parte-hartzaileekin diseinatuko da ikasturteko programa eta haiekin elkarlanean antolatuko dira jarduerak; hasiera batean bi talde sortuko dira, baina hauek zabaltzeko aukera ere badago:
- Astelehen eta asteazkenetan, 17:30etik 18:30era.
- Astearte eta ostegunetan, 17:30etik 18:30era.
Aurreko ikasturtean bezala, ahalik eta egitarau zabalena prestatuko da, eta horretarako, udalerriko baliabide guztiak erabiliko dira (publikoak, pribatuak, etab.), jarduera fisikoa eta kirola sustatzen duten herriko eragileekin elkarlanean. Finean, kiroletan oinarritutako askotariko abentura planak antolatzea da helburua, elkarrekin aniztasunean dibertitzeko. Jarduera hauek guztiak egiteko aukera eskainiko da: eskalada, mendi ibilaldiak, bizikleta tailerrak, skate–scooter, hockeya, futbola, arrauna, piragua, bela, eskubaloia, entrenamendu funtzionala, crossfit, mahai-tenisa, eskrima, judoa, ergometro txapelketa, lehen sorospenak, autodefentsa, kirol argazkilaritza eta dronak, arrantza eta ontziola… Eskaintza osoa, Koronabirusaren protokoloa eta beste hainbat informazio baliagarri ikusgai dago Pasaiako Udalaren webgunean.
