Arozenatarrek kontzertu didaktikoa emango dute hilaren 27an
Soinueneak, Abaraxkak, txistulari taldeak eta udalak antolatu dute kontzertua. Aldez aurretik tokia hartu beharko da, tokia mugatua baita.
Soinueneak, Abaraxka ludotekak, Lartaun txistulari taldeak eta udalak indarrak batu dituzte. Hilaren 27rako kontzertu didaktikoa antolatu dute, Done Eztebe parrokian. Saioa gidatuko dutenak arozenatarrak izango dira, Aitor, Urko eta Xanet.
Kontzertua 17:00etan hasiko da, eta edukiera mugatua izango du —60 pertsona—. Horregatik, aldez aurretik tokia hartu beharko da. Horretarako 645 00 54 96 telefono zenbakira deitu beharko da.
Aitor Arozenak horrela aurkeztu du kontzertu didaktikoa:
Esku bakarreko zuzeneko txirula danborraren laguntzaz XII. mendean sortzen eta Europa guztian zehar zabaltzen den musika tresna bikotea dugu, Euskal Herrian txistuaren formarekin ezagutzen duguna.
Eta Oiartzunen, dakigula, XVI. mendetik presente dugu (aurrez jotzen zela pentsa bagenezake ere). Arozenatarrak berriz, Lizartzan sortu eta Oiartzunen errotutako lau belaunaldiz osatutako txistulari saga osatzen dute.
Saio honetan hain gurea den musika tresna zahar honen nondik norakoak agertuko dizkigute, era didaktiko batean eta gure bailararekin zerikusia duen errepertorio batean oinarriturik, berezkoa duten ikuspegi umoretsu eta ludikoa ahaztu gabe.
