Aitor Zelaia eta Galder Barbado aske uzteko eskatuko dute bihar
Espainiako Auzitegi Nazionalak launa urteko espetxe zigorra ezarri die bi gazte arabarrei. Ernaik kontzentrazioa deitu du, "ankerkeria" salatzeko.
Gasteizen egindako elkarretaratze baten irudia. Espainiako Auzitegi Nazionalak Aitor Zelaia eta Galder Barbado gazte arabarrei lau urteko kartzela zigorra ezarri die, lehergaiak egiteko materiala edukitzea leporatuta. Horren harira, elkarretaratzea deitu du Oiartzungo Ernaik, biharko (hilak 6). 12:00etan elkartuko dira, Done Eztebe plazan.
Gazte erakundearentzat “epaiketa injustua” da, eta salbuespenezko legedia baten adierazle dena esan dute. “Gertutik ezagutzen dugu, belaunaldiz belaunaldi, herri honen askatasunaren alde borrokatzeagatik jo puntuan egon baita euskal gazteria. Izan ere, jakin badakite borrokarako motorra gazteok garela, eta gu geldiarazteko erabiltzen duten errezeta gazteon aurkako kriminalizazioa, errepresioa eta jazarpena da”, salatu du Ernaik.
Euskal Herriko “gatazka politikoa-armatua” betikotu nahi duela egotzi diote Espainiako Estatuari, eta konpromisoa adierazi dute belaunaldiz belaunaldi egindako borroka aurrera eramateko.
“Errepresio kasu honek, borrokan jarraitzeko arrazoi bat gehiago bestetik ez digu ematen”, gaineratu dute. “Argi geratzen baita, ezer aldatzeko prest ez dagoen erregimen autoritarioaren aurrrean aukera bakarra dugula: independentzia”.
