Peru hil zutela 37 urte bete dira gaur
1984ko otsailaren 8an hil zuten Hendaian, Angel Gurmindo errefuxiatu nafarrarekin batera zegoela tirokatu zituen GAL-ek.
Ester, Aingeru eta Argi Perurena, Blanki Pascual amarekin lehen lerroan 2019an Peruri egindako oroimen ekitaldian. Bixente Perurena Peru Errefuxiatua hil zutela 37 urte bete dira gaur. 1984ko otsailaren 8an hil zuten Hendaian, Angel Gurmindo errefuxiatu nafarrarekin batera zegoela tirokatu zituen GAL-ek. 37 urte zituen Perurenak, eta 1981ean egin zuen ihesi.
Ia lau hamarkada geroago, haren familiak ikerketa serio bat egin dadin eskatzen jarraitzen du.
Peru oroitzeko ekitaldi ofiziala antolatu zuen Errenteriako Udalak 2019ko ekainean bere etxea izan zenaren aurrean, Perurenan. Omenaldia, “bizikidetzan elkarrekin egin beharreko bidean urrats berri bat” izan zela esan zuen Peruren alaba Argi Perurenak ekitaldian.
Peru biktima gisa onartu eta indemnizazioa ematea eskatu zuen Estrasburgon demanda aurkeztuta Blanki Pascual Peruren alargunak, baina Estrasburgok, joan den urteko maiatzean ontzat eman zuen Espainiako Auzitegi Nazionalak eskaera horri jarritako betoa.
Erabaki horrekin, Espainiako Estatuari abala eman zion Estrasburgok, zehazki, Espainiako Auzitegi Nazionalak gerra zikinaren biktima izan direnen kasuan sortutako klausula eman zuen ontzat. Horren arabera, biktima izaera eta indemnizazioa jasotzeko eskubiderik ez dute, “bortxazko krimenak egin dituen erakunde bateko kide izan diren ustezko biktimek”, azken hori baieztatzen duen ebazpen judizialik ez dagoen kasuetan ere.
Espainiako Auzitegi Nazionalaren ebazpen horrek Perurenaren errugabetasun-presuntzioa urratzen zuelako aurkeztu zuen demanda Estrasburgon Pascualek.
