Mosaiko mural bat jarriko dute bidegorrian, Alaiartek eta Abaraxkak elkarlanean sortutakoa
'Zaindu ditzagun gure bazterrak' lelopean, material birziklatuarekin egingo dute murala. Hilabete iraungo dute osatzeko lanek, eta ludotekan egingo dituzte.
'Zaindu ditzagun gure bazterrak' proiektuan egin nahi dutena. Alaiartek diseinatutako Zaindu ditzagun gure bazterrak mosaiko murala bidegorrian jartzeko asmoa dute, Altzibarko komunetako kanpoaldeko paretetan, zehazki. Material birziklatua erabiliko dute, eta hainbat balore sustatu nahi dituzte: parte hartzea, eguneroko materialen berrerabilpena, naturaren zaintza, estereotipoen apurketa eta sormena. Alaiart eta Abaraxka ludotekak elkarlanean aurrera eramango dute proiektua, udalaren laguntzarekin.
Mosaiko murala, baina, osatu egin behar da lehenago. Materiala biltzen joateko deia egin dute. Horregatik, martxoaren 19ra arte, azulejo zaharrak, plastikozko ontzien tapak eta txapak zein ibaietako harri biribilak jasoko dituzte, bai ikastetxeetan baita Abaraxka ludotekan ere —arratsaldez, kasu horretan—.
Tailerrak
Sortze prozesuak hilabete inguru iraungo du. Alaia Gaztelumendik berak —Alaiarten atzean dagoen sortzaileak— egingo du murala. Hala ere, Abaraxka ludotekak 7 eta 12 urteko haurrentzako arte mural tailerrak antolatuko ditu Aste Santurako. Modu horretan, prozesuaren parte hartzaile izan daitezke.
Tailer horiek mosaikoa joango den tokian bertan egingo dira —komunetan—. Zazpi egunez egingo dira tailer horiek, eta egun bakoitzean zortzi ume egongo dira, bi orduz (11:00etatik 13:00etara).
Iniziatibaren antolatzaileentzako, pandemia garaietan “garrantzitsua” da herria koloreztatzea, naturaren zaintza sustatzea eta herriari zabalik egongo den sormenezko ekintza bat aurrera eramatea.
Informazio guztia datozen egunetan igoko dute ludotekaren webgunera.
