Altzibar urbanizatzeko 1.600.000 euroko inbertsioa onartu dute
Otsaileko plenoan onartu dute diru partida. Horrez gain, kultur ekitaldiei 43.500 euro bideratuko dizkiete, eta kirol elkarteei beste 41.000 euro.
Gai guztiak aho batez onartu zituzten zinegotziek. Oiartzungo udalbatzak herriko eragileentzako ezinbestekoak diren gaiak onartu zituen atzo, otsaileko ohiko plenoan. Gai guztiak EH Bilduren eta EAJren udal taldeen adostasunarekin atera ziren aurrera.
2021ean zehar egingo diren kultur ekitaldiak diruz laguntzea onartu zuten. Hemeretzi eskaera egin zituzten urtarrilean zehar —hori zen epea—, eta guztira 43.500 euro banatuko dituzte elkarteen artean. Kirol elkarteei, berriz, 41.000 euro bideratuko dizkiete, beraien funtzionamenduan laguntzeko. Bestalde, Arraztalo elkarteak 53.000 euroko laguntza jasoko du, buruko gaixotasunak dituztenen lan integrazioa —besteak beste— sustatzeko.
Beste gai potolo bat Altzibarren urbanizazioa izan zen. Auzoaren mugikortasun eta irisgarritasun italiarra txukundu nahi dute. Proiektua idatzita dago, eta atzo inbertsio ekonomikoa adostu zuten. Aurten 1.000.000 euro izango dira, eta datorren urtean beste 600.000. Obrak bi urteotan egiteko aurreikuspena dute.
600.000 euroko superabita
Pasa den urtekoa urte gogorra izan zen zentzu guztietan, baina udalaren diru kutxari dagokionez, aurreikuspenik ilunenak ez ziren bete. Jon del Olmo Ogasun zinegotziak azaldu zuen egoera.
Adierazi zuenez, aurrekontuan gorabehera asko egon ziren. Foru Funtsa %20 murriztuko zela iragarri zen hasiera batean, baina %9an geratu zen. “Uste baino diru gehiago etorri zen. Udalak aurrekontuan kreditu aldaketak egin zituen, egoerari eusteko asmoz, baina azaro eta abenduan egoerak hobera egin zuen”, azaldu zuen Del Olmok. Horrela, 600.000 euroko superabita geratu da udalaren kontuetan.
