"Emanaldi bakoitza bizipen bat izan da" Pasaiako Dantza Festibalak balorazioa egin du
Hirugarren edizio honetan eguraldia lagun izan dute, eta oso pozik daudela esan dute festibalaren lan taldekideek.
Eguraldia lagun, Pasaiako hirugarren dantza festibala egin zuten. Argazkia: Pasaiako Dantza Festibala Asteburuan izan den Pasaiako Dantza Festibalaren balorazioa egin du Aiert Beobide antolatzaileak eta Haatik dantza konpainiaren zuzendariak. Orokorrean, oso pozik daudela adierazi du, “balorazio oso positiboa egiten dugu” dio Beobidek: “Emanaldi bakoitza bizipen bat izan da”.
Beste urteetan bezala, hirugarren edizioari herriak erantzun egin diola uste du antolatzaileak. “Badakigu ikusle batzuk emanaldi guztietan egon direla” aitortu du.
Eguraldia lagun izan dutela esan du Beobidek, “jendeak horregatik ere disfrutatu ahal izan du”. Baina igandeko beroa handia izan zela eta eguerdiko emanaldia jarraitzea gogorra izan zela azaldu digu antolatzaileak. Umorez esan du: “Agian eguzkitakoak erabili beharko ditugu laugarren edizioan”.
Datorren urteari begira gogotsu daude laugarren edizio bat antolatzeko. Festibalak data finkoa duela adierazi digu antolatzaileak, hau da, ekaineko bigarren asteburua.
Irailean eta urrian proposamen berriak jaso ohi dituzte, dantza konpainiekin eta beste artistekin harremanetan. Herritarrek parte hartzea nahi dute, datozen urteetan haiei entzuten jarraitu nahi dutela adierazi dute. Aldi berean esan dute, herriko dantzariak oholtza gainean dantzatzen ikusi nahi dituztela.
Udaletxeko garbitzaile eta elektrikariei eskerrak eman dizkiote, ikusten ez den baina hain beharrezkoa den lana egiteagatik.
Jaialdiaren argazki guztiak Pasaiako Dantza Festibalaren sare sozialetan ikusi daiteke.
