'Euskara sarera', sare sozialetako hizkuntza ohiturei buruz kontzientziatzeko
Udalak, UEMAk eta PuntuEus Fundazioak kanpaina jarri dute martxan, bideoekin. Mundu oso erdaldunean euskaraz ari daitekeela erakutsi nahi dute.
Lazkano, Waliño eta Delgado, gaurko agerraldian. Oiartzungo Udalak, UEMAk eta PuntuEus Fundazioak kanpaina bat abiarazi dute, Euskara sarera izenekoa. Sare sozialetan zein gainontzeko teknologia berrietan dauden hizkuntza ohiturei zein erabilerari buruz hausnartzea da helburua, Josu Delgado Euskara zinegotziak azaldu duenez.
Lau aste iraungo du kanpainak, eta astero bideo bana argitaratuko dute. Udalaren, UEMAren eta PuntuEus Fundazioaren kanalak zein sare sozialak baliatuko dituzte zabalpenerako. Herritarrei dei egin diete “nahi beste” zabaltzeko.
Lau gai
“Oiartzuarrak eremu digitalean dituzten hizkuntza ohituren inguruan hausnartzera gonbidatu nahi ditugu, askotan, teknologia berrien eremua oso mundu erdalduna izaten baita”, gaineratu du Delgadok. Teknologia berriekin zein sare sozialetan euskaraz aritzeko aukerak daudela nabarmendu du.
Lau gai landuko dituzte. Alde batetik, Whatsappean idazteko aukeratzen den hizkuntza. Bestetik, sakelako telefonoan ezarritako hizkuntza. Hirugarrenik, Interneten nabigatzeko hizkuntza. Azkenik, sare sozialetan erabiltzen dena.
Adierazi dutenez, guztietan dago euskaraz egiteko aukera eta horixe da errepikatuko den galdera: “Nik euskaraz egiten dut, eta zuk?”. Horrela, Delgadok oiartzuar guztiak animatu ditu teknologia berri horietan euskaraz aritzeko.
Josu Waliño PuntuEus Fundazioko zuzendariak hartu du hitza ondoren. “Euskarak ingurune digitalean duen ikusgarritasuna handitzeko erabakigarria da ahalik eta erabiltzaile gehienek sarean ere lehen hitza euskaraz ematea eta horregatik garrantzitsua da erabiltzaileek gailuak euskaraz konfiguratuta izatea, nabigatzaileak zein mugikorrak”, esan du.
Hiru erakundeak, elkarlanean
Agerraldian gogorarazi dutenez, Oiartzungo Udala UEMAko kide da. “UEMAk udalerri euskaldunetako herritarrok esparru guztietan euskaraz bizitzeko duten eskubidea bermatu ahal izateko lan egiten du, besteak beste”, adierazi dute.
Horrez gain, udalak eta UEMAk eremu digitala euskalduntzeko hitzarmena sinatuta dute PuntuEus Fundazioarekin.
Iraitz Lazkano UEMAko lehendakariak esan du erakundeen eta eragileen arteko lana garrantzitsua dela, eta hori dela bidea. “Elkarlanean, nork bere esparrutik, sarean eta mezularitza aplikazioetan ere euskaldunak garela gogoratzeko borondateak batu gaitu, herritarrak kontzientziatu eta hizkuntza ohituretan eragin nahian”, gaineratu du Lazkanok.
Euskararen arnasguneek duten papera azpimarratu du, bere aldetik, Waliñok. “Eragin globala lortzeko tokitik aritzea ezinbestekoa da, txikitik handira jardunez, euskararen aldeko aldaketak eragiteko”, esan du.
Euskara Sarera kanpaina da hiru erakundeen arteko elkarlanaren abiapuntua. “Kanpaina honen arrakasta euskararen arrakasta izango da”, esan du PuntuEuseko zuzendariak.
