Murchanteko hilketa matxista salatuko dute bihar arratsaldean
Oiartzungo Feministen Asanbladak elkarretaratzea deitu du Erriberako hilketa gaitzesteko. Udalak bat egin du mobilizazioarekin.
Plazan egingo dute protesta, bihar.
Gizon batek Maria Pilar Berrio Jimenez bat hil zuen atzo goizean, Murchanten (Nafarroa), eta ondoren ihesari ekin zion. Gaur aurkitu dute gizonaren autoa hutsik, Legazpin. 9 eta 5 urteko seme-alaben aurrean hil zuen emakumea. Bere koinata zen.
Hilketa matxista hori salatzeko, elkarretaratzea deitu du Oiartzungo Feministen Asanbladak. Bihar arratsaldean egingo dute, plazan. 19:30ean hasiko da mobilizazioa.
Udalaren oharra
Oiartzungo Udalak bat egin du biharko mobilizazioarekin, eta herritarrak gonbidatu ditu bertan parte har dezaten. Gogorarazi dute Euskal Herrian, aurten, hil duten laugarren emakumea dela.
Udalak hilketa matxista “gogor” gaitzetsi du, eta gizarte parekide baten alde lanean jarraitzeko konpromisoa duela adierazi dute. “Emakumeen bizitzak arriskuan egongo ez diren gizarte bat eraikitzen jarraituko dugu”, zehaztu dute.
Gainera, udaletxeko balkoian indarkeria matxista salatzeko puntu lila jarrita dutela gogorarazi dute.
