Papresak sortzen duen ingurumen arazoan udalak "interes handirik" ez duela dio Eguzkik
Bi eskaera egin dizkiote udalari: Papresarekin berriz bilduko balira, IAKri jakinaraztea eta bileraren akta egitea eta horren kopia IAKri bidaltzea.
Maiatzean bildu ziren instituzioak Papresaren ingurumen eragina gutxitzeko asmoz. Maiatzean bildu ziren Errenteriako udala, Eusko Jaurlaritza eta Papresa eta udalerrian fabrikak duen eragina arintzeko neurri plana lantzen hasi ziren.
Eguzki talde ekologistak azaldu du, bilera horretan erabakitakoa txosten batean bildu behar zutela eta Ingurumen Aholku Batzordeari (IAK) jakinaraziko zitzaiola, ondoren ekarpenak egin ahal izateko. Txostena pasa ez izana eta bileraren aktarik jaso ez izana salatu du, besteak beste, talde ekologistak.
Papresak sortzen dituen arazo guztiak ez direla landu diote ekologistek, gainera, arazo gehiago sortu direla uste dute: “gutxitu beharrean, geroz eta handiagoa den trafiko astuna, arnasarik ez hartzera behartzen gaituzten usain nazkagarriak, tona handiko kamioiek bidegorria inbaditzeaz gain, oinezkoentzat ere dakarten arriskua”.
Bileraren ondoren bete beharrekoa ez betetzea, “hiru aldeen erabateko zorroztasun falta” gisa ulertzen du Eguzkik, eta beste alde batera begiratzeko ahalegina izan dela esan dute. Arazoari buruz erakunde gisa “interes handirik” ez izatearen sentsazioa “sendoagoa” daukatela orain nabarmendu du taldeak.
Bi eskaera egin dizkiote udalari: Papresarekin berriz bilduko balira, IAKri jakinaraztea eta bileraren akta egitea eta horren kopia IAKri bidaltzea.
