Bisita gidatuak eskainiko ditu Jantziaren Zentroak irailean
Argiak, kamera... Moda! erakusketarako bisita gidatu bereziak egingo ditu Jantziaren Zentroak irailaren 11, 18 eta 25ean. Zinemako historian ikur izan diren hamar jantziren kopiak bildu dituzte erakusketa horretara.
Zinemako hamar jantziren kopiak egin ditu Jantziaren zentroak erakusketa antolatzeko. Zinemako historian ikur bilakatu diren hamar jantzi aukeratu, kopiak egin eta erakustea erabaki zuen Jantziaren Zentroak. Iraila amaiera arte izango da zabalik Argiak, kamera… Moda! erakusketa. Hamar jantzi, bederatzi diseinatzaile eta hamarnaka anekdota batu dituzte erakusketara; bederatzi horietatik hiru emakume, eta Oscar saria jaso duten hiru jantzietatik bi, emakumeek egindakoak dira.
Irailean zehar, hiru hitzordu antolatu dituzte erakusketara bildutako jantzi horiek lehen eskutik ikusi, haiek diseinatu zituztenen gaineko informazioa jaso eta diseinatzaile zein jantzi zituzten aktoreen bitxikeriak ezagutzeko. Irailaren 11, 18 eta 25ean bisita gidatu bereziak egingo ditu Jantziaren Zentroak, euskaraz 19:00etan eta gaztelaniaz 20:30ean eta 22:00etan. Parte hartzeko izena eman behar dute interesdunek Turismo Bulegoko 943 49 45 21 telefono zenbakira deituta, edota posta elektronikora mezua idatzita.
