Oiartzungo Turismo Bulegoak 2.271 bisitari izan ditu udan
Azken urteetako bisitari kopururik handiena izan du Oiartzunek 2021eko udan. Kulturabirusak eta Urdiñola irekitzeak zerikusia izan dute horretan.
Urdinola-Arizmendienera aldatu dute aurten turismo bulegoa. Oiartzungo Turismo Bulegoa uztailean eta abuztuan egon da irekita. Epe horretan 2.271 bisitariri eman die harrera. Azken urteetako bisitari kopururik handiena izan dela esan dute arduradunek.
2020arekin alderatuta, %23 igo da turismo bulegoaren erabiltzaileen kopurua. Batez ere ingurukoak dira bisitariak: gipuzkoarrak izan dira gehienak (%22,3) eta hurrenak, Kataluniakoak (%6,59) eta Frantziako estatutik etorritakoak (%4,87). Madrildik, Valentziar Herrialdetik eta Bizkaitik iritsitakoek ere kopuru polita osatu dute.
“Bizi dugun osasun egoera berezia dela eta, tokiko turismo asko izan da”, esan dute Turismo Bulegoko arduradunek. Haien ustez, herriak zein bailarak aukera ona ematen die jarduerak aire zabalean egiteko, naturak inguratuta.
Bisitari gehienak, hala ere, oiartzuarrak izan dira. “Ziurrenik”, azaldu dute arduradunek, “izan du zerikusia Turismo Bulegoak egoitza berria estreinatu izanak Urdinola-Arizmendienea etxean eta Kulturabirusa udako kultur programazioaren baitan antolatutako ekintzetako sarrerak ere Turismo Bulegoaren bidez banatu izanak ere”.
Jardueren balantzea, positiboa
Udan antolatutako jardueren balantzea egin du udalak. Horrela, Urdinola-Arizmendiena etxe-museoak jakin-mina piztu duela ziurtatu dute.
Turismo bulegoa jasotzen du, eta horrek erraztu du bisitariak jasotzea. Guztira, 462 lagunek bisitatu dute (295ek bisita librean eta 167k bisita gidatuetan).
Arditurriko Tren Berdea ere arrakastatsutzat jo dute. Meategiak bisitatzera joateko trena 549 lagunek hartu dute.
Kanpotik etorritako bisitariek gehien eskatu duten informazioa herrian zer ikusi, mendi-ibilbideak, museoak eta gastronomiaren ingurukoa izan dela azaldu dute Turismo Bulegoko langileek.
Horrez gain, Done Eztebe elizaren sekretuak 115 lagunek ezagutu dituzte.
Bisita gidatuak, aurrera
Urdinola eta parrokia ezagutzeko hitzorduek jarraituko dute. Hilabete honetan, etxe historikoa ezagutzeko aukera egongo da ostiralero, 12:00etan, Elena Zalakain eta Joxe Mari Mitxelenaren eskutik.
Mitxelenak hilabete honetan eta datorrenean jarraituko du elizaren nondik norakoak azaltzen. 11:00etan izango dira bisita gidatuak, asteazkenero.
Bi bisitak dohainik izango dira, baina aldez aurretik eman beharko da izena, Oarsoaldeko Turismo Bulegoan (Madalen kalea, 3, Errenteria-Orereta). Harremanetan jartzeko, 943 49 45 21 telefono zenbakira deitu beharko da, edo e-posta bidez idatzi.
