Lujanbio, Arzallus, Egaña eta Maiarekin bertso festa Errenteria-Oreretan
Urriaren 2rako antolatu du Erein elkarteak lau bertsolari handi bilduko dituen jaialdia. Sarrerak hilaren erdialdean jarriko dituzte salgai, hamar euroan.
Amets Arzallus eta Maialen Lujanbio, bertso festan izango direnetako bi. Argazkia: erran.eus. Erein elkarteak bertso festa antolatu du urriaren 2rako (larunbata). Goi mailako kartela osatu dute: Maialen Lujanbio, Amets Arzallus, Andoni Egaña eta Jon Maia dira oholtza errimekin josiko dutenak. Orratza eta haria, hau da, gaiak, Amaia Agirrek emango dizkie. 19:00etan hasiko da bertso jaialdia, Niessenen.
Ereineko kideek iragarri dute sarrerak hilaren erdialdean jarriko dituztela salgai, 10 euroko prezioarekin. Horiek aurrez aurre Xenpelar Kultur Dendan eta Landare elkartean erosi ahal izango dira. Online salmenta ere prestatuko dute, Errenteriako Udalaren sarreren salmenta zerbitzuaren bitartez.
HITZAk lau sarreraren zozketa egingo du, bi pertsonentzat bina. Zozketaren xehetasunak aurrerago emango ditu hedabideak.
