Erronkei erantzuteko hausnartzen hasi dira
COVID ondorengo tokiko gobernantza publiko-komunitarioen erronkak ikastaroa egingo dute gaur eta bihar Lekuona Fabrikako Sorleku aretoan. Gobernantza publiko komunitarioaren erpin guztiak ukituko dituzte ikastaroan.
Mendoza, Subirats eta Gomez ikastaroan egin duten hitzartzean. Tokiko gobernantza ereduen gaineko hausnarketa hasi dute gaur goizean Lekuona Fabrikaren sorlekuan. Izan ere, gaur eta bihar egingo dute bertan COVID ondorengo tokiko gobernantza publiko-komunitarioen erronkak ikastaroa Errenteriako Udala eta EHUko udako ikastaroen eskutik hamarnaka lagunek. Aizpea Otaegi alkateak inauguratu du ikastaroa. Ikastaroaren helburua hirukoitza da: udalgintza publiko komunitarioaren inguruko teoria mailako ekarpenak ezagutzea; COVID testuinguruko politika publikoen praktika zehatzak partekatzea; eta COVID ondorengo tokiko politiken erronken inguruan gogoetarako tartea zabaltzea. Horien bueltan 27 hizlari arituko dira bi egunetan.
Otaegiren hitzartzearen ostean heldu da lehen hitzaldia Julen Mendoza, Joan Subirats eta Laura Gomezen eskutik. Hirurak hurbileko erakundeen erronkez aritu dira. Silvia Piris, Irati Mogollon eta Felix Arrietak, berriz, zaintzak dituen erronketan jarri dute begirada, ondoren. Hezkuntzari ere eman diote tartea ikastaroan, erpin guztiak ukituko baititu ezinbestean. Arlo horretaz, Olaia Jimenez Arrieta, Xabier Besalu eta Maria Victoria Fernandez Roldan aritu dira.
Bazkaltzeko tartearen ostean, begirada feministatik ariko dira arratsaldeko lehen saioan, Norma Vázquez , eta Saioa Iraola Urkiola. Eta eguna amaitzeko, teknologia askeen garapenak ere hartuko du bere espazioa jardunaldian, Jaione Martinez Saez de Maturana, Igor Leturia Azkarate, eta Iñaki Alegriaren eskutik. Biharko egitaraua hemen kontsulta daiteke.
107 lagunek eman dute izena ikastaroan eta tartean Errenteriako Udal teknikariak, Pasaia, Donostia eta Gipuzkoako Foru Aldundiko hainbat teknikari, Errenteriako Udaleko zinegotziak zein beste herrietakoak, unibertsitateko ikasleak eta EH Bilduko hainbat ordezkari.
