Kilometro Lezo azken metroetara iritsi da
Bihar (ostirala) dantza izango da kultur proposamenaren ardatza, eta etzi (larunbata) GonaPK lezoarrek eta En Tol Sarmientok joko dute.
Agortu egin dira En Tol Sarmientoren kontzerturako sarrerak. Kilometro Lezo kultur egitasmoaren azken asteburua izango da honakoa. Hiru saio izango dira honakoan, lau beharrean. Izan ere, biharko (ostirala) 20:00etarako programatuta zegoen Orratx! Antzerki Taldearen Antroan intro emankizuna bertan behera utzi dute; bihar argitaratuko den OARSO BIDASOKO HITZAren astekarian emanaldia egingo dela agertzen bada ere, ez da horrela. HITZAk zenbakia inprentara bidali ondoren jakin du Orratx!-ek ez duela antzerkia egingo.
Hala ere, bada zer ikusi eta entzun. Bihar, esaterako, dantzarako tartea zabalduko du egitasmoak. 23:00etan hasita, Lezoko Eztandak taldeak hamar minutuko dantza saioa eskainiko die Herri Eskolako jolastokira (han dira emanaldi den-denak) doazenei. Jarraian, Amaiur Luluaga dantzariak J-AhO! II: nor da eroa, zu edo ni? izenburuko ikuskizuna taularen gainean jarriko du. Ondoren, Ertza konpainiaren Meeting Point ikusteko aukera izanen da.
Larunbatean musikaren txanda da. 19:00etan, GonaPK Lezoko taldearen txanda izango da, eta ondoren (20:30ean) En Tol Sarmientok emango dio bukaera aurtengo Kilometro Lezori; kontzertu horretarako ez da sarrerarik, agortu egin dira.
Sarrerak oraindik ere salgai dituzten emanaldietakoak lortzeko, joan hona.
