Izena emateko epea zabaldu dute Xenpelar Tailerrek
Xenpelar Tailerrek ikasturte berrian eskainiko dituzten ikastaroen berri eman dute gaur goizean Maite Gartzia Kultura zinegotziak eta Iker Tolosa Kultura teknikariak.
Iker Tolosa teknikaria eta MAite Gartzia zinegotzia. Xenpelar Tailerrek ikasturte berrian eskainiko dituzten ikastaroen berri eman dute gaur goizean Maite Gartzia Kultura zinegotziak eta Iker Tolosa Kultura teknikariak. Ohiko ikastaroak eskaintzen jarraituko dute: helduentzako pintura, zeramika, argazkigintza, egur taila, zaharberritze eta patchwork; eta 8 eta 12 urte arteko ahurrei begira, berriz, arte plastikoen tailerra antolatu dute. Iazko ereduari jarraiki, pintura eta zeramika tailerrak hiruhileko bi ikastaroetan banatu dituzte: teknika lantzeko ikastaroa batetik, eta norberak proiektuak garatzekoak bestetik. Gainontzeko ikastaroetan iraupena ikasturte osokoa izango dela azaldu du Tolosak.
Maite Gartziak eman du aurtengo berritasunaren gaineko informazioa: “Izen ematearen gaineko hausnarketa eginda, aurten, lehenengoz, online izena emateko aukera izango da web orriaren bidez”. Horretarako epea hilaren 13an zabalduko dute. Ohiko matrikulazio moduak ere indarrean mantenduko dituzte, eta aurrez aurreko izena ematea egiteko, aldez aurretik hitzordua hartu beharko dute interesdunek 943 44 96 00 edo 010 telefono zenbakietara deituta hilaren 14tik 1era bitartean. Behin hitzordua hartuta, Zu! Zure Udala zerbitzurako txanda izango dute tramitazioa egiteko.
Ikasleek tailerreko matrikula bakarra egin dezakete, eta ordu eta egun ezberdinetako hiru izen emate tailerreko. Gartziak nabarmendu du, lehentasunen arabera aukeratu behar dituztela ikasleek egutegi eta ordutegiak, orden hori hartuko baita kontutan esleitzerakoan. Pintura eta zeramika tailerren kasuan berriz, ordu edota egunetan hiru izen emate onartuko dira hiruhileroko.
Ez da garrantzitsua izango izena ematearen ordena, izan ere, zozketa bidez esleituko dituzte plazak eta ez izena emateko ordenaren arabera. Zozketa soilik eskaera kopurua plaza kopurua baino handiagoa den kasuetan egingo dute. Izena emateak, beraz, ez du plaza bermatuko.
Zozketaren emaitzak hilaren 29an jakinaraziko dituzte, eta emaitza horien arabera esleituko dira plazak izena ematean adierazi diren lehentasunak errespetatuz.
Informazio guztia Xenpelar Tailerren web orrian edo 943 44 96 35 telefono zenbakian kontsulta daiteke.
