Altzibar berrurbanizatzeko prestaketak astelehenean hasiko dira
Auzoaren gune historikoa degradatua dagoela-eta egingo dituzte obrak, baita mugikortasuna hobetzeko ere. Lehen prestaketa, langileen biltegiarena.
Datorren astelehenean, hilak 27, Altzibar berrurbanizatzeko obren prestaketa hasiko da. Biltegi gisa erabiliko duten eremua prestatzea izango da lehenengo urratsa.
Udalak azaldu duenez, agintaldiko helburu nagusietako bat da Altzibar biziberritzea. Altzibarko auzogune historikoa degradatua dagoela zehaztu du udalak, eta hori berritzea da asmoa. Klarene plaza, eta Donepetri, Mikelete eta Martintxo kaleetan egingo dituzte interbentzioak.
“Altzibar Oiartzungo bigarren auzorik handiena da biztanleria aldetik eta handitzen jarraitzen du oraindik ere”, azaldu dute. “Hala ere, behar eta gabezia nabarmenak ditu, batez ere alde historikoan. Horregatik, urbanizazio lan integrala izango da udalak gauzatuko duena”.
Bi helburu nagusi ditu berrurbanizatzeak. Alde batetik, mugikortasuna hobetzea eta oinezkoen segurtasuna bermatzea. Horren barruan sartuko dira oinezkoen bideak eta espaloiak berritzea; errepidea asfaltatzea; aparkalekuak markatu eta seinalitika berritzea.
Bestetik, zaharkituak dauden azpiegiturak berrituko dituzte: ur-harguneak, argiteria lurperatu eta saneamendu sarea.
Lanak, eremuka
Udalak jakinarazi duenez, lanak eremuka egingo dituzte, auzotarrei ahalik eta eragin gutxien egite aldera. Prestaketak bukatuta, Klarene plazarekin hasiko dira. Eremu bakoitzeko lanak hasi aurretik Udalak beharrezko zehaztapenak eta jakinarazpenak egingo ditu.
Altzibarko berrurbanizatze lanek urtebete iraungo dutela adierazi dute, eta 1.280,774,25 euroko inbertsioa suposatuko du.
Altzibarko auzo batzarrean (urriaren 5ean, 19:00etan, udaletxeko areto nagusian) lan hauei buruzko azalpenak eta zehaztasunak emango dituzte udaleko ordezkariek.
