'Ondare irisgarri eta inklusiboa' jardunaldiak egingo dira, urriaren 1etik aurrera
Bertako ondarea ezagutzeko helburuz, mahai ingurua, erakusketak, hitzaldiak edota proiekzioak antolatu ditu udalak. Programazio hau Aldundiaren ondarearen Europako jardunaldiaren baitan dago eta ondare musikala, industriala eta historikoa izango dira hizpide aurtengo edizioan.
Aizpitarteko kobazuloei buruzko hainbat jardueratan parte hartzeko aukera izango da. Beste urte batez Ondarearen Europako Jardunaldiak antolatu ditu aldundiak Ondare irisgarri eta inklusiboa lemapean, eta Errenteriako Udalak bat egin du hainbat jarduera antolatuz. Ondare musikala, industriala eta historikoa izango dira hizpide aurtengo edizioan.
Lehen ekintza Eresbil elkarteak antolatutako mahai-ingurua izango da, Ondare musikala eta desgaitasun bisuala, erronka berriak. Bertan parte hartuko dute musikari eta ikertzaile batek, liburutegi zerbitzuetan aritzen den ONCEko kide batek eta Eresbil taldeko batek, besteak beste. Amaieran, braille idazkeran dagoen partituren emanaldi bat eskainiko dute. Ekitaldi hau urriaren 1ean izango da, 11:00etan hasita eta Eresbilen egoitzan.
Aizpitarte haitzuloan labar pintura eta grabatuen aurkikuntza egin zenetik, kalifikatutako ondasun gisa katalogatu zen lekua eta jendearentzat itxi zen. Inguru hau jendeak ezagutu dezan, urriaren 4tik 10era hainbat aktibitate antolatu dituzte. Hasteko, Aizpitarte III eta IV kobazuloei bisita birtuala dokumentala aurkeztuko dute Aizpea Otaegi alkateak, Maria Jose Telleria Aldundiko kultura zuzendariak, Diego Garate arkeologoak eta Javier Busselo espeleologoak, urriaren 4an 18:30ean Niessengo auditorioan.
Aldiz, lehen proiekzioa hurrengo egunean (hilak 5) egingo dute Niessengo auditorioan, eta gerturatu ezingo dutenek, urriaren 5etik 9ra ikusgai izango dute Lekuona Fabrikako plaza luzean, etengabeko proiekzioan egongo delako 09:00etatik 20:00etara. Bestalde, urriaren 9an (larunbata) eta urriaren 10ean (igandea) lau bisita gidatu antolatu dituzte haitzuloetara: 10:00etan, 11:30ean, 12:00etan eta 13:30ean, Listorreta Barrengoloia informazio gunetik abiatuta.
Paleolitoko ondare honen inguruan bi hitzaldi ere eskainiko dira Lekuona Fabrikako plaza berdean: batean, urriaren 7ko 18:30ean, Iñaki Intxaurbek hitz egingo du Paleolito garaiko haitzuloetan dekoratutako sektore sakonerako irisgarritasuna gaiari buruz. Bestean, Maria Angeles Medina ariko da solasean Paleolitoko argiztapen sistema nagusien ezaugarriak hitzaldian; urriaren 8an izango da 18:30ean.
Kobazuloekin jarraituz, bi tailerretan parte hartzeko aukera egongo da. Ainhoa Paskualen eskutik, urriaren 5ean 17:30ean, Aizpitarteko haitzuloetako irudi ezagunenak erreproduzitzeko labar pinturako tailerra aurrera eramango da. Bestetik, urriaren 6an 17:30ean, oihalezko estanpazio tailer bat egingo da, aurreko tailerreko helburu berarekin. Biak ala biak Lekuonako plaza berdean izango dira.
Ondare industriala ere presente egongo da jardunaldietan. Horretarako, 1980ko Errenteria, Oiartzun eta Pasaiako ondare industriala erakusketa eta hitzaldiaz gozatzeko aukera egongo da. Santi Yaniz argazkilariak Oarsoaldean industria ondarearen 100 argazki baino gehiago atera zituen eta errestauratu eta digitalizatu egin duen bere dokumentazio lan hau aurkeztuko du.
Berarekin batera egongo dira Deustuko Unibertsitateko Xabier Landabidea ikerlaria eta Elixabete Perez, aipatutako unibertsitateko Euskal Ikasketen Institutuko zuzendaria, urriaren 18an Xenpelar etxean, 18:30ean. Erakusketa irekita egongo da aurkezpenaren egun beretik, azaroaren 6 bitarte, astelehenetik ostiralera, 17:00etatik 20:00etara.
