Oielekuko ondare naturala eta kulturala ezagutzeko txangoa, igandean
Kultura-paisaia ezagutarazteko ibilaldia antolatu du Parketxe Sareak. 10:00etan geratu dira, eta ibilbide erosoa izango dela jakinarazi dute.
Oielekuko paisaiak ezagutzeko ibilaldi gidatua dute datorren iganderako, urriak 3. Ondare naturalak eta kulturalak bilakatutako ondare-paisaiak erakutsi nahi ditu Parketxe Sareak. “Naturaren eta gizakiaren jardueraren arteko harremanak denboraren buruan paisaia gizatiartuak sortu ditu, kultura-paisaiak alegia”, azaldu dute.
Oieleku horren adibide garbia dela nabarmendu dute antolatzaileek. “Lehenik eta behin, mendiko larreak ditugu, alderdi horretan abeltzaintzak izan duen eta oraindik duen garrantziaren adierazle”, esan dute.
Zerrendatzen jarraitu dute: “Belardietan zenbait mairu-baratze edo cromlechak ikus daitezke. Baina batez ere, paisaia hauek mito eta kondaira ugariren iturri izan dira: mairuak, intxixuak…asko dira inguru hauetan murgildu diren pertsonaia mitologikoak…”.
Ibilbide erosoa eta nornahik egiteko modukoa dela ziurtatu dute. Hori bai, oinetako erosoak eramateko eskatu dute. “Helburua ez da asko ibiltzea”, zehaztu dute, “gauzei erreparatuz eta gidariaren azalpenenen laguntzarekin, kondaira betetako paisaian murgiltzea baizik. Hamaiketakoa egiteko tartea egongo da”.
Azalpendun txangoa 10:00etan hasiko da, Kausoko aparkalekutik. Bi ordu eta erdi iraungo ditu, eta toki berean bukatuko da. Hamabi urte baino gehiago dituztenek bost euro ordaindu beharko dute, eta gutxiago dutenek, 3.
Informazio gehiago nahi duenak 943 49 50 69 edo 688 89 50 68 telefono zenbakietara dei dezake.
