Ostegunak tipi-tapa ibiltzeko izango dira berriro
Ariketa fisiko osasuntsua egiteko helburuarekin, Elorsoro kiroldegian jarriko dute zita, astero. Tipi-Tapa Abittu zerbitzuaren barruan dago.
Herriko bideetatik egingo dituzte ibilaldiak. Datorren ostegunean —hilak 30—, Tipi-Tapa egitasmoa martxan jarriko da berriro. Paseoak ematen dituzte, taldeka, ariketa fisiko osasuntsua egiteko asmoarekin. Bide batez, harreman sozialak indartzen ere laguntzea da Tipi-Taparen asmoa.
Ostegunero elkartuko dira, herrian barrena ibilaldiak egiteko. Elorsoro kiroldegian jarriko dute zita, 09:30ean. Edonork egiteko moduko ibilaldiak direla ziurtatu dute antolatzaileek, eta 50 minutu eta ordu eta erdi artean iraungo dute.
Parte hartzeko ez da izenik eman beharko. Nahikoa izango da egun eta ordu horretan Elorsoron agertzea.
Tipi-Tapa dinamika antolatzen duena Abittu zerbitzua dago. Bizitza osasuntsuagoa eramateko Oiartzungo zerbitzua da. Orain dela hiru urte eta erdi jarri zen martxan, eta helburua da jarduera fisikorik egiten ez dutenak ariketa egiten jartzea.
