Eskualdeko Itaiak Emakume Langileon Eskolak antolatu ditu
Emakume Langileon Eskolak prestatu ditu Oarsoaldeko Itaiak, eta lehen saioa urriaren 31an egingo dute Pleno aretoan.
Itaiak Salda Badago jardunaldi feministetan ere egin zuen hitzaldia.
Ikasturte honetarako Emakume Langileon Eskolak antolatu dituzte Oarsoaldeko Itaia sareko kideek, iaz hasi zuten bidea jarraitzeko asmoarekin.
Bi hilabetean behin elkartuko dira, eta hizketagai ezberdinak landuko dituzte jardunaldi bakoitzean. Lehen saioaren ardatza Genero problematikaren hausnarketa eta aurrera begirako erronkak izango da, Durangon izan ziren Salda Badago jardunaldi feministetan landu zutena hain zuzen ere.
Eztabaida eta hausnarketarako topaketak izango direla azaldu dute. Izan ere, emakume langileei gaitasun teoriko eta politikoak eskuratzeko ahalegina ukatu egin zaie sarearen esanetan.
Eskualdeko herri guztietara iritsi nahi dutenez, eskolaren lekua aldatzen joango dira, eta lehena Oiartzunen izango da urriaren 31an, 17:00etan, udaletxeko pleno aretoan. Egunean bertan azaltzea nahikoa izango da parte hartu ahal izateko, eta gerturatu aurretik landuko den edukia irakurtzea eskatu dute.
