Añarbeko urtegian kanal alternatiboa egiteko eskatu diote ministerioari
Urriko ohiko plenoan aho batez onartu dute obra egitearen eskakizuna. Bestalde, URA agentziarekin lau urterako protokoloa ere onartu dute.
Atzoko plenoko puntu guztiak aho batez onartu ziren. Urriko ohiko plenoa egin zuten atzo. Bederatzi puntuko gai-zerrenda zuten, eta bozkatu beharreko gaiak aho batez atera ziren aurrera.
Añarbeko Mankomunitateak mozioa aurkeztu zuen. Bertan, bigarren kanal alternatibo bat eraikitzeko eskatzen zioten Espainiako Trantsizio Ekologikoko ministerioari.
Izan ere, ia 300.000 pertsonen —oiartzuarrena, tartean— ur-hornidura arriskuan egon daiteke egun dagoen kanal bakarrean ezbeharrik balego.
Urgentziazko eskaera egin diote ministerioari, lanak lehenbailehen has daitezen. 24 milioi euroko kostua izango lukete kanal alternatibo horren obrek. Mankomunitateko kide diren beste herrietako udal batzuetan ere onartu da mozioa.
Mozio osoa irakur daiteke esteka honetan klik eginda.
URArekin, protokoloa
Beste gai hidrografiko bat izan zuten esku artean. URA agentziarekin lau urterako protokoloa sinatu zuten.
Modu horretan, Oiartzungo ibai eta erreketako jabari publikoa zaindu eta lehengoratzea izango du helburu URA agentziak.
Oiartzungo Udalak jabari horretako hondakinak jasoko ditu, URAren lana errazteko. Erakunde bakoitzak bere gain hartuko bere arduren kostuak.
Oarsoaldea eta Abarka
Gainontzeko puntuei dagokienez, Oarsoaldea Garapena Agentziari urteko hirugarren hiruhilekoan egin beharreko ordainketa onartu zuten. 75.360 euro izango dira udalak bideratuko dituenak.
Bestalde, udalak eta Abarka GKEak hitzarmena sinatzea onartu zuten. Hitzarmenari esker, Oiartzunen egoitza duen erakundeak gela bat izango du Altzibar auzoko Agerrealde etxadiko udal lokaletan.
Herri eta kultura ezberdinen arteko zubi lanak egiten ditu Abarkak, batez ere gazteekin.
