1936ko Gerran fusilatutakoei lore eskaintza egin diete
Urtero bezala, oiartzuar talde bat hurbildu da hilerrira, memoria ariketa egitera. Tartean ziren Katin Txiki eta udaleko ordezkariak.
Gerran hildakoei lore eskaintza egitera joan diren oiartzuarrak.
Gaur hilak oroitzeko eguna da, eta horregatik, urtero bezala, 1936ko Gerran fusilatutakoak gogorarazi dituzte. Oiartzuar talde bat hilerrira joan da, lore eskaintza egitera. Tartean izan dira Katin Txiki elkartekoak eta udaleko bi talde politikoetako ordezkariak.
Gerra hartan 21 oiartzuar hil edo desagerrarazi zituzten. Hilerriko paretaren kontra 110 lagun fusilatu zituzten, eta Pikoketan beste hamahiru miliziano hil. Gainera, hainbat hobi komun ere badira herrian.
Bi hilabetetan 250 oiartzuar atxilotu zituzten, orduko 5.200 biztanleen ia %5.
Peña Gantxegiren artelanaren parean egin dute lore eskaintza. Monumentuaren alde bakoitzean jartzen dituen Manuel Lekuonaren esaldiak gogorarazi ditu EAJk, bere twitter kontuaren bitartez: “Erriari zioten gorrotoz il zinduzten” eta “Erriaren gogoan bizi zerate“.
