Lopez de Herediaren golak ez dira nahikoa izan garaipena eramateko
Oiartzunek Osasunaren bisita jaso du Ugaldetxon, partida animatuan. Mutilek Aretxabaletan galdu dute, hasieratik okertu zen partidan.
Partida bukatzean eraso matxisten kontrako pankarta atera zuten bi taldeek.
Oiartzun Kirol Elkarteko nesken talde nagusiak ez zuen emaitza onik lortu atzo eguerdian Karla Lekuonan jokatutako partidan, baina hortzak erakutsi zizkion Osasuna Bri.
Hori bai, norgehiagoka modu txarrean hasi zen etxeko taldearentzat. Iruindarrek bi gol sartu zituzten, jokoan izan zuten nagusitasunaren fruitua bilduz. Atsedenaldira iritsi baino lehen Ane Lopez de Herediak arnas pixka bat eman zien oiartzuarrei.
Bigarren zatiaren hasierak ez zuen zerikusirik izan partidako lehenengo minutuekin: talde urdina egonkortuago zelairatu zen, eta arriskua sortzeko gai izan ziren. Hala ere, atearen aurrean asmatu zutenak gorritxoak izan ziren.
Jasotako hirugarren gol horrek oiartzuarrak, kikildu beharrean, hauspotu zituen. Erasora jo zuten, atea etengabe bilatuz, eta aldea txikitzea lortu zuen, berriro, Ane Lopez de Herediak. Ez zen gehiagorako tarterik izan.
Partida bukatu ondoren, bi taldeetako jokalari eta beste ordezkari batzuek pankarta atera zuten eraso matxisten kontra. Izan ere, urriaren 10ean, Karolina Sarasua Osasunako jokalariak irain matxistak jaso zituen Santanderren, Nueva Montaña taldearen kontra jokatutako partidan.
Kantabriako klub horren txandala zeramaten bost mutil oso gaztek mehatxatu, epailearen aktaren arabera (epaileari ere irain matxistak bota zizkioten). Nueva Montañako presidenteak berak salaketa jarri zuen irainak bota zituztenen kontra.
Nesken B eta C taldeak, lider
Mutilen talde nagusiak, berriz, Aretxabaletan jokatu zuen larunbat arratsaldean. Etxekoak azkar aurreratu ziren, baina oiartzuarrak ez ziren hondoratu. Behin eta berriro bilatu zuten Deba Goienako taldearen atea, asmatu gabe.
Bigarren zatian punteriak ez zuen hobera egin. Bai, ordea, UDArenak, eta horrela beste bi gol gehiago lortu zituzten.
Gainontzeko futbol taldeei dagokienez, nesken bigarren taldeak emaitza sendoa lortu zuen Deban, eta sailkapenaren buruan da. C taldea ere bikain dabil, are gehiago Santo Tomas garaituta. Lehenengo postuan dira beraiek ere.
Mutilen bigarren taldeak, berriz, Vasconiaren kontra galdu zuen. Zazpi partidatan garaipen bakarra lortu du Oiartuzn Bk.
Areto futbolean, Miren Tabernak Eguzki taldea jipoitu zuen, Lasarte-Oriako kiroldegian. Pixkanaka goiko postuetan finkatzen ari dira. Garaipen hori Oiartzun KEk ostegunean lortu zuenari batu zaio.
FUTBOLA
Emakumeen Lehen Nazional Maila
- Oiartzun — Osasuna B: 2-3.
Gizonezkoen Ohorezko Erregional Maila
- Aretxabaleta UDA – Oiartzun: 3-0.
Emakumeen Ohorezko Erregional Maila
- Amaikak Bat — Oiartzun: 1-5.
Gizonen Gorengo Maila
- Oiartzun — Vasconia: 0-2.
Emakumeen Gorengo Maila
- Oiartzun — Santo Tomas Lizeoa: 3-1.
ARETO FUTBOLA
Gizonen Gipuzkoako Lehen Maila
- Oiartzun KE — Herrikide: 4-2.
Gizonen Gipuzkoako Bigarren Maila
- Eguzki Ventanas Isu— Miren Taberna: 2-7.
SASKIBALOIA
Gizonen Gipuzkoako Bigarren Maila
- Oiartzungo Saskilagunek jokatzen duen liga ez da jokatu.
Emakumeen Gipuzkoako Bigarren Maila
- Oiartzungo Saskilagunak parte diren ligako taldeek atsedena hartu dute asteburuan.
