Udalak bost pertsona kontratatuko ditu, Enplegu Planarekin
Hiru peoi, peoien arduradun bat eta delineatzaile bat kontratatuko ditu, aldi baterako, Oarsoaldea Garapen Agentziarekin elkarlanean.
Oiartzungo Udalak bost pertsona kontratatuko ditu, Oarsoaldeko Enplegu Planari esker. Epe motzean izango dira kontratazio horiek.
Zehazki, hiru peoi, peoien arduradun bat eta delineatzaile bat izango dira kontratatuko diren lanpostuak.
Udalak adierazi duenez, balio anitzeko peoiek igeltserotza, margotze, garbiketa eta lorezaintza lanak egingo dituzte. Delineatzaileak, berriz, altxamendu topografikoa garatuko du, Hirigintza sailean. Lau eta bost hilabeteko kontratuak izango dituzte.
Eskualdeko plan hori Oarsoaldeko Garapen Agentziarekin elkarlanean eginda dago. Enplegua sustatu eta lan-munduratzean laguntzea da helburu nagusia.
Oiartzungo Udalak 67.687,74 euro bideratuko ditu Enplegu Planeko bost lanpostu hauetara.
