Urdaburu eguna ospatzeko, hiru txango proposamen eta bazkari bat
Urdaburu mendizale elkarteak bere egun handia ospatuko du, azaroaren 28an. Horretarako, haur eta helduentzako, bazkide eta ez bazkideentzako hiru irteera eta bazkari bat antolatu dituzte. Bestalde, burdinolen arrastoen bila joateko Artikutzara txangoa egingo dute ere aurretik, azaroaren 20an.
Urdaburu eguna ospatuko du izen bera duen mendizale elkarteak, azaroaren 28an, eta horretarako, hiru txango desberdin eta Arritxulon bazkaria proposatu dituzte. Gainera, lehentasuna bazkideek izango duten arren, edonork parte hartu dezake, beti ere aurretik izena emanda azaroaren 18a baino lehen. Hona hemen hiru irteera aukerak:
- Helduen txangoa: 14, 5 km egingo dituzte mendizaleek, eta ibilbidea Arrritxulo-Endara-Domiko-Bidango-Bianditz 840-Arritxulo izango da. Zumarditik aterako dira 07:30ean.
- Eskolartekoen ohiko txangoa eta gurasoak: Listorreta-Urdaburu-Listorreta mendi martxa egingo dute, eta Iztietatik aterako da autobusa 08:00etan.
- Txikien txangoa: Eskolartekoekin ibiltzen ez diren haurrei zuzendutako irteera izango da, eta gurasoekin edo arduradun batekin joan beharko dute nahitaez. Susperregitik abiatuko dira 08:00etan, Urdaburura igo, eta bertan Ikastolako mendizaleekin elkartuko dira. Ondoren, denak batera, Susperregira jaitsiko dira berriz.
Arritxulora iristean, 14:30ak aldera, babarrunak sakramentuekin edo haurrentzako menua jateko aukera egongo da, 20 edota 5 euroren truke. Mendi martxara joan ez, baina bazkarira bai gerturatu nahi izanez gero, autobusa aterako da Zumarditik 13:45ean.
Bestalde, azaroaren 20rako 15 kilometroko mendi irteera antolatu dute Artikutzatik hasi eta amaituta, Goizarin, Elama eta Urdalluera, Enobietako urtegitik pasata. Hala ere, lehenik, Zumardiko autobus geltokian elkartuko dira 07:30ean eta 07:35ean Lintzirinen, eta momentu horretan 10 euro kobratuko dituzte irteeraren gastuei aurre egiteko. Txangoaren asmoa, burdinolen arrastoak bisitatzea izango da.
Urdaburu egunerako edo Artikutzako irteerarako, elkartean bertan, elkartearen web orrialdean edota 943 527 879 telefono zenbakira deituta izena eman beharko da, astearte eta ostegunetan 19:00etatik 21:00etara.
