Zelaiak eta larreak izango dituzte aztergai Lezo Institutuko ikasleek
Eskolako Agenda 2030 proiektuaren 14.ikasturtea hasiko dute Lezo Institutuko ikasleek, eta zelai eta larreei buruzko azterketa egingo dute oraingoan. Ondoren, udalari jakinaraziko diote ikerketaren nondik norakoak, eskaerak egiteko aukera izango dute ere.
Zelaiak eta larreak aztergai ikasturte honetako Eskolako Agenda 2030 proiektuan. Lezo Institutuko ikasleek zelaiak eta larreak izango dituzte hizpide Eskolako Agenda 2030 proiektuaren baitan. Aurtengoa 14.ikasturtea izango da, eta beste aldietan bezala, azterketaren nondik norakoak azaldu eta eskaerak egingo dizkiote udalari amaieran, 2022ko maiatza inguruan.
Aurreko ikasturtean basoak ikertu zituzten, eta ondoren, ekainean egin zen udalbatza berezian, klaseak aire librean emateko gune bat, landare eta zuhaitz espezieen berreskurapenarekin jarraitzea, Altamira parkeko berritze proiekturako ikasleen proposamenak aintzat hartzea, eta herriko ibilbideak eta natura ezagutzeko jarduerak eskaintzea eskatu zuten.
Ondoren, Leire Beteta ingurumen teknikariak erantzuna eman zien eskakizun hauei, esanez, Altamirako parkea berritzeko proiektuan txertatu dutela aire libreko ikasgela sortzea, eta diseinua egiten ari den arkitekto taldeak ikasleek ezarritako irizpideak barneratuko dituztela.
Basoekin jarraituz, eukalipto eremu bat hemengo espezieekin birlandatzeko azterketa egiten dabiltzala azaldu du Betetak. Honetaz gain, Altamirako anfiteatro inguruan dauden zuhaitzen identifikazioa eta interpretazio euskarriak zeintzuk diren jakiteko lana ikasleekin burutzea proposatu du udalak.
Bestalde, herriko ibilbideen seinaleztapenaren mantenua hobetzen eta antolatzen ari direla gaineratu du teknikariak, eta udalaren orrialde eta sare sozialetan ingurumen jardueren berri ematen jarraitzen dutela.
