Hiru dokumentu aurkeztu ditu Donibaneko Saneamendu Osotasunaren Aldeko Batzarrak udaletxean; horien artean, udal arduradunekin "berehala" biltzeko eskaera.
Atzo sinatu zuten eskaera azten bizilagunek.
Donibaneko saneamenduaren aurreproiektuari ekarpenak egiteko azken eguna izanki, goiz-goizean, 08:00ak aldera, aurkeztu dute Donibaneko bizilagunek euren herri eskaera Pasaiako udaletxean. Hiru dokumentuz osaturiko eskakizunak 642 lagunen babesa jaso du sinadura bilketan, baina aldekoak gehiago direla argi utzi dute: “Kalera atera besterik ez da egin behar auzokoen iritzia jakiteko”.
Gaia herri mailan lantzeko Donibaneko Saneamendu Osotasunaren Aldeko Batzarra sortu dute bizilagunek eta horren izenean, hain zuzen, eskatu diote Pasaiako Udalari administrazioaren legezko betebeharra den soluzioa -hondakin urak badian isurtzeak Europako 91/271 araua urratzen baitu- elkarlanean diseinatzeko. “Aspalditik datorren auzotarren eskaria da”.
Denera hiru dokumentu eraman dituzte gaur udaletxera: sanjuandarren eskakizunak biltzen dituena, horren sostengu diren sinaduren zerrenda, eta udal arduradunekin bilera bat egiteko eskaera. Azken horri dagokionez, hurrenez hurren, Pasaiako alkate eta Donibaneko alkateorde diren Izaskun Gomez eta Loreto Osari “ahalik eta azkarren” elkartzeko eskaera egin diete.
Argi dute zer nahi duten:
- Soluzioak herritarren iritzia kontuan har dezala.
- Konponbidea integrala izan dadila (%100ean jasoz egun badiara isurtzen diren hondakin urak).
- Sareak berma dezala sanjuandar guztiek “aspaldidanik behar diren oinarrizko hornidura guztiak” izatea, gasa barne.
- Lanak teknikoki posible den epe laburrenean garatzea.
Elkarbizitza eta ingurumen arazoak biak batean jasaten dituztela salatu dute herritarrek
Gasa, alde zaharrera
Komunikazio sare modernizatuaz gain, luzaroan galdegin izan duten gas hornidura alde zaharrera lurpetik eramatea ezinbestekotzat jo dute: “Bereziki larria da, bertan bizi diren pertsona askoren adinari erreparatuta; izan ere, butano/propano bonbonba astunak erabili behar izaten dituzte (askotan, hirugarrenen laguntza behar izaten dute, oso zaila baita horien garraioa) ur beroa izateko. Gainera, bonbona banaketa sistema eskasa da”.
Desengainuz bizi izan zutela proiektuaren aurkezpena aitortu dute, “ilusioz” espero baitzuten aipaturiko hutsuneak konponduko zituela saneamendu sare berriak. “Teknikariek egindako azalpenaren emaitza etsigarria izan zen, oso”. Irtenbidea sare berriarekin ez badator, beranduegi izango ote den beldur dira: “Nola konponduko du udalak gas hornidura, aurkeztutako proiektutik kanpo uzten badu?”.
Bizilagun guztientzako soluzioa
Sanjuandarren nahigabearen beste arrazoi nagusietako bat saneamendu sare berritik kanpo geldituko diren etxebizitzak dira. Izan ere, arduradunek azaldu zuten sistemak ezingo zituela jaso biztanle guztien hondakin urak, irisgarritasun arazoengatik, eta 40 bat bizilagunenek egunera arte bezala -uretara zuzenean isurtzen- jarraitu beharko zutela, epe labur-ertainera behintzat.
“Bistakoa dirudi aurkeztutako aurreproiektuak ez diola erantzun integralik ematen arazoari”
Epe luzeegiak
Adituek aurkezpenean azaldu zuten “gutxienez 5 urte” beharko dituztela saneamendu sare berria Donibanen ezartzeko, eta horrekiko kezka agertu zuten bizilagunek, aurkezpenean ez ezik, baita sinadurak bildu dituen idatzizko dokumentuan ere. “Saneamenduaren behin betiko konponbidea atzeratzeaz gain, gainerako horniduretarako sarbidea (gasa alde batera utzita) ere 2030. urtera arte atzeratuko da, gutxienez. Onartezina, guztiz”, salatu du auzo elkarteak.
Oarsoaldeari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako.Herrigintza egin nahi dudalako.Oarsoaldeko euskarazko komunitatearen parte izan nahi dudalako. Oarsoaldeko herritarrok behar dugulako.
