Haur eta gazteentzako Nazioarteko Txotxongilo Jaialdia egingo da, hurrengo astean
Haur eta gazteei zuzendutako Nazioarteko Txotxongiloen Jaialdia berriz antolatu dute iazko geldialdiaren ondoren. Guztira bost konpainia igoko dira taulara, bost goizetan zehar, datorren azaroaren 22tik 26ra.
Bueltan da Pasaian erreferente klasiko bilakatu den Nazioarteko Txotxongilo Jaialdia, eta aurtengo 27. edizioa hilaren 22tik 26a bitarte izango da. Tolosako Ekinbide Etxearen laguntzarekin antolatu du udaleko Haur, Nerabe eta Gazteen Sustapen departamentuak, haur eta gazteei zuzendutako egitarauaren baitan.
Katalunia, Alemania, Andaluzia, Gaztela eta Leon eta Poloniako konpainiak etorriko dira aurten, eta goiz bana izango dute haien obrak antzezteko, Juanma Berasategi Auditorioan. Udalerriko hirugarren, laugarren, bosgarren eta seigarren mailako ia 700 ikasle izango dituzte ikusle.
Azaroaren 22an, astelehena, Hamelin antzeztuko du Lleidako Xip Xap konpainiak. Edonorena izan litekeen hiri baten zorigaitz misteriotsua izango da agertokia, eta bertako bizilagunen elkarbizitza era dramatikoan aldatuko dela gertaera baten ondoren azaldu dute.
Hurrengo egunean, hilak 23, Alemaniako Maayan Iugman konpainiaren txanda izango da, eta Niyar, paperezko istorio bat aurkeztuko dute. Antzerki bisualeko pieza artistikoa dela dio taldeak, eta “irrika eta autoerrealizazio nahiaren istorio eternala” izango dutela ardatz diote.
Asteazkenean, azaroak 24, Eco emanaldia eskainiko du Andaluziako Ymedio konpainiak. Aske sentitzea, loturekin apurtzean baino, loturekin bizitzean datzala diote, eta protagonista dituen bi komikoen amesgaizto errepikakorra izango da afera hau.
Azaroaren 25an, osteguna, Baychimo Gaztela eta Leongo konpainiaren Sally Jonesen kondaira-z gozatzeko aukera izango da. Ordu txarrean jaiotako eta zoritxarreko bizitza bat bizitzera kondenatua dagoen gorila baten istorioa kontatuko dute. Abentura, azpijoko, bakardade, bortizkeria, borroka, noblezia eta betiko adiskidetasunezko bizitza izango dira landuko diren gaiak.
Kukuryku ikuskizunarekin itxiko du jaialdia Poloniako Ola Muchin konpainiak, azaroaren 26an. Osvaldo Drevno magoak ustekabean egiten ditu trikimailuak bere laguntzaile den oiloarekin, eta bidean beste hainbat pertsonaien laguntza jasoko du.
