Saneamendurako proiektua osa dadin exijitu du EH Bilduk
Herri proposamenarekin bat eginez, hiru eskakizun nagusi egin dizkio koalizio abertzaleak egungo proiektuari: sare integrala, gasa eta epeen murrizketa.
Saneamendu sare integrala "ingurumenaren aldeko apustu irmoa" litzakeela uste du EH Bilduk. 
Donibaneko saneamenduaren proiektua “integrala” izan dadin eskatu du Pasaiako EH Bilduk. Sanjuandarren sinadura bilketan jasotako oinarriekin bat eginez, hiru eskakizun nagusi dituzte: obren kanpo uztea aurreikusita dagoen 40 etxebizitzak ere sarean integratzea, alde zaharrera gasa eramatea eta lanen epeak murriztea.
Gasa, mendi magaletik
Berriki koalizio abertzaleak 2022ko udal aurrekonturako aurkezturiko proposamenean, Donibaneko kale zaharreko mendi magalen eta itsas-ertzaren ikerketa geologikoa egin eta gasa –edo bestelako udal azpiegiturak– menditik sartzeko aukerak aztertuko dituen proiektua idazteko diru partida eskatu du alderdiak.
Sanjuandar guztientzako saneamendu sarea
Bilkideen arabera saneamenduaren proiektua osorik gauzatzea posible da, baina hori ez egiteko arrazoia aurrekontua da: “Hori egiteak obra honetara bideratuko diren baliabide publikoak handitzea suposatuko luke”. Izan ere, 4,5 milioi euroko aurrekontua ez da aski obratik kanpo utziko liratekeen etxebizitzen barruan obrak egin eta horien tutueriak saneamendu sare berriarekin lotu ahal izateko.
Arazoa teknikoa ez, eta ekonomikoa dela argi izanik, erabakia gaitzetsi du oposizioko alderdiak. Gobernu organoek diru publikoarekin etxe pribatuetan zuzenean obrarik egin izan badute ere, diru laguntzak eskatu dituzte bizilagun horiek lanak gauza ditzaten sare berrira konektatu ahal izateko. “Hori litzateke benetan saneamendu integralaren aldeko eta batez ere ingurumenaren aldeko apustu irmoa egitea”.
Epeak murriztu
Obrak iraungo duen denbora “ahalik eta laburrena” izatea exijitu dute: “Ez da bidezkoa obrak 5-6 urtez luzatzea turismoa bultzatzen jarraitu nahi delako. Obra teknikoki 2,5-3 urtetan gauzagarria bada, epe horretan egiteko konpromisoa eskatzen dugu, bizilagunek jasan beharreko afekzioak ahalik eta murritzenak izan daitezen”.
Horrekin, turismo sektoreko komertzio eta kolektiboei diru laguntzak emateko proposamena ere egin dute, lanekin eratorritako afekzioek izango luketen inpaktu ekonomikoa orekatzeko.
“EH Bildu prest dago elkarlanerako, prest gaude beharrezkoa den diru eta baliabide publikoak obra honetara bideratzeko. Prest al daude J.I. Asensio, Izaskun Gomez eta Loreto Osa foru eta udal agintariak?”.
