Etorri berriei harrera egingo diete berriro
COVID-19ak eragindako hutsunearen ostean harrera saioak berreskuratzeko apustua egin du udalak. Hilaren 27an egingo dute aurtengoa.
Oiartzungo Udalak jakinarazi berri duenez, herrira etorri berri direnentzako harrera saioak egingo dituzte berriro. COVID-19a dela eta bertan behera utzi behar izan zuten egitasmoa, baina berreskuratzeko apustua egin dute. Helburua, udalaren arabera, “Oiartzunera etorri berrien harrera naturalagoa izan dadin, gurera etorri berri diren herritarrak eta lehendik bertan bizi direnak elkartzea” da.
Azken hilabete hauetan herrian erroldatu direnei gutun bana bidali diete, 300 gutun baino gehiago banatu dituzte jada saioen gonbidapenarekin.
Saioa hilaren 27an (larunbata da) izango da, Abaraxka ludotekan. Bertan jatorri eta adin askotariko herritarrak bildu nahi dituzte. Otordutxo bat eskainiko diete bertaratutakoei, eta musika eta kanturako tarte bat ere izango dute. Udaletik nabarmendu dutenez, herriko zein atzerriko jakiak dastatzeko aukera izateko edonork nahi duena eraman dezake.
