Adimen desgaitasuna duten pertsonen aldeko kanpaina abiatu du Atzegik
'Geroz eta gehiago gara eta nonahi gaude' lemapean abiaraziriko sentsibilizazio kanpainaren bitartez Atzegizale espiritua indartuko dute.
Herenegun Pasaian egindako aurkezpeneko irudia. 
Sentsibilizazio-kanpaina abiatu du Atzegik, adimen desgaitasuna duten pertsonen aldeko Gipuzkoako elkarteak, Geroz eta gehiago gara eta nonahi gaude lemapean. Herenegun Pasaian egindako aurkezpenean azaldu zuten Atzegizale espiritua indartzea izango dela aurtengo helburua.
Iniziatibak duela 20 urte sorturiko figura balioan jarri nahi du, adimen desgaitasuna duten pertsonekiko jarrera positiboa erakusten duten pertsonena (Atzegizaleak), hain zuzen ere. Atzegizaleenek “keinu txikiak diruditen arren”, desgaitasun intelektuala duten pertsonen bizitzan “eragin handia” dutela nabarmendu dute arduradunek.
“Atzegizale diren pertsona asko daude, baina oraindik ez dakite”, izan ere, zenbaitek pentsa dezakete boluntario izatea edo Atzegiko jardueretan parte hartzea dela horretarako baldintza, baina ez du zertan hala izan. Hori dela eta, kontzeptua ulertzen laguntzeko hainbat material sortu dute arduradunek kanpainaren barne: kartelak, animaziozko pieza eta baita testigantzen bideoak ere.
Horiek guztiak Atzegiren webgunean topa daitezke. Elkarteko kideek dei egin diete figurarekin identifikatuta sentitzen direnei “familia handiaren” parte izatera anima daitezen.
60. urteurrena, abenduaren 20an
Datorren abendu bukaeran, Atzegik 60. urteurrena ospatuko du Donostiako Kursaal Aretoan, iaz pandemiagatik bertan behera utzi behar izan zutena berreskuratuz.
Datozen urteetarako lan-ildoak zehazteko asmoz abian jarririko hausnarketa estrategikoaren ondorioak partekatzeko ere probestuko dute hitzordua. Honakoak dira xehetasunak: abenduaren 20an, 19:00etan, Kursaal Aretoan. Bertaratu nahi dutenek posta elektroniko bidez idatzi edo 943 42 39 42 telefonora dei dezakete gonbidapenak eskatzeko.
